يالا نساعد الى وقعو فى ادمان المواقع الاباحيه

احنا خلاص مش حنغضب ربنا تاني بالمواقع الاباحية..يلا نساعد اللي وقعوا في الأدمان ده

حنتكلم عن لينك بيطلع لنا بندوس عليه , وفاجئة نلاقي نفسنا جوه موقع ثقافي "اباحي"
ايه اللي حصل للواحد خلاص دلوقتي بقى جوه موقع اباحي , كأن اللينك ده شبكة عنكبوت بتحاول لحد ما بتوصل للي هي عايزاه , بتحضر الفخوخ وللاسف في ناس كتير بتقع وأول ما بتقع بنلاقي العنكبوت بدأ يمص دم الفريسة

انت يا مان يا معلم او يا بنوته , بمجرد الدخول غلط على اي لينك لموقع اباحي , حب الفضول بيخلينا ندخل من لينك ل التاني لموقع اباحي لغيره لاخوه ولابن عمه تلاقي نفسك دخلت على كذا موقع لدرجة انك بتدمن الدخول على المواقع دي , وكمان لو انت لسه مش متجوز , الشهوة عندك بتبقى عالية والداعي عنك حيبقى اقوى , وانت عمال يتمص في دمك وقوتك , وللاسف الانسياق وراء المواقع دي بيضيع الصحة , انسان ربنا كاتبله الخير والصحة والحياه الجميلة مع الحلال يقوم هو يغضب ربنا ويدخل على مواقع زي دي ويغضب ربنا ومايغضش بصره عن الحرام ومن حرام لحرام ممكن يقرر يجرب التجارب دي عملي , واقل التجارب العادة السرية والاخطر انه يوصل انه يزني , كل ده من دوستك على لينك غلط

طيب الناس اللي بتدخل على المواقع الاباحية بتدخل ازاي؟؟؟
يا أما دخل على لينك غلط , واللينكات دي كتيرة اوي جوة النت وبتطلع زي العفاريت مانعرفش بتطلع منين
يا أما صديق سوء قالك على الموقع الفلاني وقالك على اللينك العلاني
يا أما البحث عن المواقع دي

طيب المواقع دي والدخول عليها رأي الدين فيها ايه؟؟
وهذه الكلمات نقلا من موقع الإسلام سؤال وجواب
إنَّ مِن عظيم ما ابتُلي به الناس في هذه الأزمان ، وتفردوا به عن سائر القرون الماضية ، ما يرونه ويشاهدونه من انتشار العري والتهتك والإباحية ، وألوان الشهوة التي لا يردعها خُلُق ولا حياء ولا دين ، حتى غدت أجساد النساء أرخص سلعة ، وأهون بضاعة ، ولم تكد بيوت المسلمين تسلم من شررها ولا خطرها ، فهي موجودة في التلفاز والإنترنت وفي الشوارع والطرقات وفي الكتب والصحف والمجلات والجوالات ، تتنافس في قلة الحياء وتتسابق إلى استحواذ قلوب الناس والتأثير فيها
يقول الله عز وجل : ( ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ ) الروم/41

للاسف كلنا مش فاهمين كل المعاني اللي جوه حديث رسول الله الذي قال فيه : كلكم راع وكلكم مسؤل عن رعيته
والانسان في هذه الحياه مسئول عن كل شئ في نفسه من جسد ويد وقدم و أذن وعين , وسيحاسب على كل هذه الاشياء اذا استفاد الانسان منها في الخير واطاع بها الله كانت سبب دخوله الجنه لانه يستعين بها على فعل الطاعات , واما اذا استخدمها في معصية الله ستأخذه الي النار والهلاك لانه اغضب الله بها , وخدوا بالكم يا جماعة بان الانسان العاصي لايخلد في النار بفضل الله ولكن رب العالمين ينقيه من ذنوبه في النار ثم يدخله الجنة بفضله ورحمته ,
"فالمؤمن العاصي ما دام يشهد بالله رباً ينتهي حاله إلى الجنة إذا نُقي من ذنوبه
والله تعالى أعلم" "هذه الفتوى منقوله"

بس هل يا جماعة حد يستحمل نار الدنيا ؟؟ عشان يستحمل نار الاخرة اللي نار الدنيا ماتجيش فيها نقطة في بحر
لما بنتلسع من كبريت مش بقول من نار البوتوجاز بتحرقنا وبنتعب , فما بالكم واحد نزلت عليه نار بركان في الدنيا , ده يسيح , فما بالكم بقى بنار الاخرة اللي بتولع فينا ونار الاخرة سودا مش حمراء او صفراء زي نار الدنيا , تخيل نفسك جوه حجرة ضلمة بتتحرق وانت اعمى , كذلك نار الاخرة ضلمة وسودا لدرجة انك حتتوجع وانت مش عارف الوجع والحرق جاي منين

احنا بنصوت لو الطبقة الاولى من الجلد اتلسعت , فمابالكم ان انسان الطبقة الاولى متشالة وتتحرق الطبقة الثانية , فما بالكم بنار الاخرة اللي بتحرق السبع طبقات وبعد ماتتحرق ربنا يبدلها تاني ويرجع الجلد جديد عشان العذاب يبقى جديد وأليم

هل شوية متعة ناقصة ومش كاملة تستاهل اننا نقعد ولو جزء من ألف من الثانية نلمس نار الاخرة؟؟
مانقضرش نستحمل الجزء من ألف جزء من الثانية داخل النار فما بالكم باللي يقعد دقيقة او ساعة أو يوم

فالمقابل , الأمل الجديد
قال تعالى
""إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا
الله أكبر , شوفوا قد ايه رحمة ربنا
شوفوا كل واحد عمل حاجة غلط في حياته يقدر يلحق نفسه طول ما جواه روح وحياه
قبل فوات الآوان لان الموت بيجي فاجئة

جزء من شعر عاجبني قولت اكتبه :
فكرت في حالك لما...بتكون بتعصيه
والموت يجيلك فاجئة...من غير ماتحس بيه

طيب بسرعة ايه الاضرار على الانسان من المواقع دي ؟؟
أولا الاضرار النفسية والعضوية
النفسية انه بيتعذب وضميره بيلومه بعد كل دخول , والعضوية بعد مايدخل في اللي اكبر من كده ويتجه للتدخين سواء مخدرات او شيشة او يعمل العادة السيئة واللي كل الحاجات دي حرام اصلا , وعواقبها كبيرة زي ما انتم عارفين على الصحة وعلى فقدان اللذة بعد كده , لان الانسان اللي بيستهلك اللذة في الحرام اللي مكتوباله , بعد ما يتجوز مش حيحس باللذة اللي ربنا وضعهاله في الحلال
بس برضة دوول اللي ماتابوش
الله رحيم
وبرضة نذكر قول الله تعالى :
""إِلَّا مَنْ تَابَ وَآمَنَ وَعَمِلَ عَمَلًا صَالِحًا فَأُوْلَئِكَ يُبَدِّلُ اللَّهُ سَيِّئَاتِهِمْ حَسَنَاتٍ وَكَانَ اللَّهُ غَفُورًا رَحِيمًا
يعني اللي يتوب ويلحق نفسه حياته حتتبدل وتبقى طبيعية بفضل الله

اياك تكون هدف بيتحقق ضد أمة سيدنا محمد صلى الله عليه وسلم أو الأمة العربية؟؟
الناس اللي بتصدرنا الحاجات دي بأغراء الشباب على النت او بالكليبات او بالاغاني والمسلسلات اللي احنا بنعملها او اللي بنجيبها من برة سواء كانت عربية او تركية او اجنبية او غيرها وكمان الأفلام التي لاتخلوا من مشاهد اباحة و و و وكمان بقينا بنقلدهم في الغلط وبنتفنن اننا نظهر مساوءنا , يعني لو فرضنا ان الافلام دي هادفة , بالعكس بتفسد أكتر ما بتصلح

الناس اللي عايزين يدمرونا دوول من برة او من جوه
اللي من برة ناس عايزين يدمرونا وبجبروتهم عايزين يدمرونا بفلوسنا , لان احنا اللي "بنلهث" واسف للتعبير , بنلهث وراء الحاجات بتاعتهم وبندفع فيها فلوس , وبقى علناً بتتباع الافلام الاباحية في شوارعنا
يعني من الاخر : عايزين يهدموا الدين بتاعنا بإنهم يبعدونا عن ديننا ويخلونا نغير الدين بتاعنا او الدين بتاعنا مايكونش القائد بتاعنا , عايزين هوانا هو اللي يتحكم فينا وهو ده فعلا اللي بدأ يحصل
الشباب والبنات دلوقتي معظمهم مش كلهم خلفيتهم عن الدين الاسلامي لا تتعدى 10 % والاخطر من كده ان في ناس تعرف عن الدين اكتر من النسبة دي , بس مش بتطبق
وفي ناس من جوه : عايزين يدمرونا مش مهم المهم يكسبوا فلوس زي قنوات الاغاني والفيديو كليبات والرسائل اللي في البار اللي بتكسبهم يوميا ما لا يقل عن مليون او اكثر في اليوم الواحد من تفاهات ورسائل بنبعتها بنفسنا

عايزين الأمة الاسلامية تتدمر لما يصدرونا ويخلونا مدمنين مواقع اباحية و و و وسيبنا سنة سيدنا محمد صلى الله عليه وسلم وكلام ربنا

اللي والله لو بس فهمنا جزء بسيط منه او بعض الاحاديث , حنعيش سعداء لو بس طبقنا اقل من 10 % من سنن الرسول , وبالطبع الفرائض بتاعة ربنا بنسبة 100% طبعا مافيهاش نقاش

عايزين الجنة ورؤية النبي ورضا ربنا ورؤية وجه الله الكريم , ولا عايزين هوانا وشهوة غير دائمة ومافيهاش لذة كاملة و النار والخلود فيها او العذاب فيه مدة من الزمن؟؟

الحل السريع : نرجع بسرعة لربنا ونتوب ومدنخلش على المواقع دي تاني , ونستعين بربنا ومانكونش هدف لحد عايزين الاسلام هو اللي في النهاية ينتصر ويسود العالم من تاني , هو آه الآن في حالة ضعف , ولكن رسول الله صلى الله عليه وسلم قالنا على أمل جميل " الخير في وفي أمتي الي يوم الدين"
والكلام موجه للشباب والبنات , يلا ياجماعة الجنة في انتظارنا بفضل الله لو سيبنا شئ من اجل الله وبدأنا ومشينا في طريق ربنا , والهلاك والعذاب والتعب والقلق في انتظارنا لما نبعد عن طريق ربنا

والله الموفق , وجزاكم الله خيرا



مـنـــقـــــــو ل