الأخلاقيــــــات

بســـم الله الرحمن الرحيم

كنت امبارح ف اول محاضرة من كورس أسمه (الأخلاقيـــات) .. لدكتور شريف عبد العظيم مؤسس جمعية رسالة الصراحة انا سمعت حجات كانت على طول ف بتدور ف دماغي بس متوقعتش انها توصل لكورس كامل وأسمه كمان الأخلاقيات .. وطول المحاضرة كنت فاكر حديث النبي عليه الصلاه والسلام "إنما بُعثت لأتمم مكــــارم الأخلاق" .. يعني اساس دينا اصلا الأخلاق
ومن الأمثلة اللي قالها د.شريف .. اكتشفت اننا مش ف بالنا خالص الموضوع دا واننا فصلنا الصلاه عن حياتنا .. عشان كان المفروض ان صلاتنا تأثر على حياتنا .. زي ماقال مصطفي حسني ان الواحد زي مابيكون مؤدب بين ادين ربنا ف الصلاه – يبقي مؤدب وهو بيتعامل مع الناس زي ماكان مؤدب ف الصلاه حكالنا د.شريف عنه لما سافر أخد الدكتوراه من برا .. لقي ان كلمه ( أخلاق – Ethics) او العلم دا ضروري اوي هناك ومفيش جامعه محترمة او كلية محترمه مش بتدرس العلم دا .. ومفيش حد بياخد الدكتوراه هناك غير لما ينجح ف العلم دا ولو سقط فيه .. مياخدش الشهادة بتاعته ويطردوه .. هوا قال كدا والله هنا بقي ف مصر .. مفيش تدريس دا خالص وحتي هو قال لواحد صاحبة دكتور قبل كدا انت مدرستش ال Medical Ethics صاحبة اعد يضحك وقالة يعني ايه ؟؟ .. راح ترجمهالوا – قاله لا معناها ايه يعني ندرسها ازاي ؟؟ قالنا بقي اللي سافر بره ميعديش عليه اسبوع غير لما يسمع الكلمة دي كذا مرة يعني من الاخر العلم دا لازم يدرس هنا ف مصر ف كل كلية وكل جامعة وكل مدرسة .. عشان نتربـــي ونعرف ازاي نعامل بعض وازاي دا هيعود علينا ف الاخر على فكرة د.شريف بيدرس العلم دا ف كلية هندسة من سنه 1999 – وبسبب دراسته للكورس دا للشباب هناك >> نُشئت جمعية رسالة الخيرية اللي ليها 28 فرع ف مصر 7 منهم ف القاهرة – ووصل عدد المتطوعين ل 70 ألف متطوع

ندخل بقي ف اللي قاله بأختصار >>
محدش فينا بيتعلم ازاي يشوف مصلحته .. بس لازم نتعلم ازاي نشوف مصلحة الناس اللي زينا بالظبط ويمكن تكون نفس الحاجة اللي انا عايزها زي مثلا لو انت هتركب مواصلة معينه والدنيا زحمة جدا .. والناس طبعا بتزق بعض عشان كل واحد يشوف مصلحته ويروح .. لو فكرت دول مش مجرمين ولا اشباح .. دا ممكن اللي عايز يروح وبيزقق عشان يركب الاول دا يكون عايز يروح عشان يزاكر ويطلع من الأوائل .. بس مهموش مصلحة غيره وشاف نفسه بس حكالنا د.شرف لما طلعت النتيجة عنده ف الجامعة طلبة سنه اولي كان كل واحد فيهم عايز يشوف نتيجته الاول وكان عددهم 450 طالب والنتيجة طلعت ف طرقة صغيرة جدا .. حصلت خناقات كتير وكان في واحدة هتموت لما دخلت تجيب النتيجة ف الزحمة فلما راح محاضرة لطلبة سنه تانية قالهم ع اللي حصل .. قالوله هنعمل ايه يعني الكلية اللي غلطانه انها تطلع النتيجة ف طرقة صغيرة قالهم اقفوا طابو .. اعدوا يضحكوا وقالوله ازاي هنقف طابور ف النتيجة دي حاجة غريبة جدا وعمرهم ماتخيلوها قالهم فعلا الكلية غلطانه والحكومه غلطانه الناس كلهم غلطانين .. بس دا مش مبرر اني اغلط انا كمان زيهم وفعلا لا طلعت النتيجة بتاعتهم سنه تانية .. ف نفس الطرقة وكان عددهم بردو 450 طالب .. وقفوا طابور والدفعة كلها شافت النتيجة ف نص ساعه انتوا عارفين كمان ان سفينه تايتانيك الشهيرة .. غرقت بسبب تصرف غير أخلاقي ؟؟ بأختصار .. ان السفينه دي اتسمت نسبة ل التيتانيس دول ولاد الأهلة اليونان (ولاد زيوس) .. ومعناها الضخامة وانها فعلا سفينه جبارة وكبيرة جدا .. القانون سعتها كان بيقول ان مفيش سفينه تطعل الا وعليها 750 قارب نجاه .. عشان دا كان اكبر عدد لركاب على سفينه ف الوقت دا .. وتيتانيك بقي تعدد الرقم دا بمراحل وركبت 2500 فرد على السفينه .. والسبب الغير أخلاقي بقي انهم اتبعوا القناون اللي بيقول انهم يحطوا 750 قارب نجاه .. واتجهوا بأقصي سرعه ف البحر ولقوا الجبل الثلجي دا ف ملحقوش يوقفوها .. ف النهاية بقي عدد الناجيت كان - 750 فرد والباقي ماتوا .. بسبب غير أخلاقي هديكوا أمثله وكل واحد يقول الحل بتعها من وجهه نظرة بأستخدام القواعد ال5 1-واحد فاتح شركة كومبيوتر كبيرة اوي بيجيب الباور سابلايز من تايوان .. وهو اصلا بيتصنع هناك 170 وات ف بعد ما اتفق مع الناس خلاص واشتري سألوه ؟؟ نحطلك استيكر مكتوب عليه 170وات ولا 200 وات ؟!! قالهم ليه يعني .. قالوله عشان احنا متعودين لما نصدر لمصر على طول بنحط استيكر مكتوب عليه 200 وات !!! قالهم لا وحطوا ال 170 وات وتمام كل حاجة .. جه هنا مصر محدش اشتري منه حاجة ويقولهم الحقيقة وانهم بيضحك عليهم .. لا الناس مش مصدقينوا وخسر وكان هيفلس .. ايه الحل الخلاقي للموضوع دا ؟؟ .. يضحك عليهم ولا يكمل ويفلس ؟؟ 2-واحد فاتح مدرسة خاصة كبيرة وعايز يحط كاميرات ف الفصول عشان يراقب العملية التعليمية ويشوف المدرسين بيتعاملوا ازاي يحط الكاميرات ويخالف المبدأ اللي بيقول (ولا تجسسوا) ولا يسبها عايمة وميراقبهمش ؟؟ القواعد الأخلاقية الخمسة اللي بنحل بيها كل المشاكل اللي بتقابلنا وبنخاف تكون لا اخلاقية .. لو طبقنا القواعد دي هنحلها بكل سهولة

1-القاعدة الذهبية : عامل الأخرين كما تُحب أن يعاملوك به شوف كدا لو بتعمل حاجة لحد لو بتحب انهم يعاملوك بنفس الطريق تبقي دي اخلاقية لو غير كدا وطنش وهي جت عليا .. تبقي لا اخلاقيه زي ممضرة ف مستشفي كانت بتشتغل شغل رهيب عن بقيت زمايلها مع انها بتاخد نفس المرتب .. ولما سألوها ليه بتعملي كدا قالتلهم انها بتفكر لو حد من عيلتها مكانهم كدا كانت تحب ان الممرضة تعاملهم ازاي والمعني دا موجود ف القرأن والأحاديث (لا يؤمن أحدكم من لا يُحب لأخيه مايُحب لنفسه)
يعني طبق كدا كل حاجة ف حياتك ع القاعدة الذهبية دي لو لاقيت انك فعلا بتعمل حاجة لحد زي ماتحب انه يعملهالك .. يبقي انت اخلاقي

2-المبــــــادئ : لو في حد بيسرق الأغنيا عشان يدي الفقرا ؟؟ يبقي دا اخلاقي لو غير اخلاقي ؟؟ لو دي طبقتوها ع القاعدة اللي فوق رقم 1 .. مش هتمشي عشان انت لو فقير هتتمني فعلا كدا ان اي حد يسرقهم عشان يدوك انت بس في مبدأ وهو ان السرقة حرام حتي لو سرقت من الراجل الغني دا 100 جنية .. يعني مش هتفرق معاه اصلا .. لا دي مسأله مبدأ حتي لو كانت منفعة عاملة
طبقوها كدا ولو مشيتها صح .. تبقي انت اخلاقي ..

3-المنفعــة العامــة : واحد بيشتغل ف مصنع عربيات راح واحد صاحبة قاله : شغلتك دي حرام !! قاله ليه ؟؟ .. قاله انتوا السبب ان الناس بتموت واكتر الحوادث ف العامل كله بسبب العربيات سواء كانت بسبب السواق نفسه او ان العربية تكون بايظة ف تتقلب بيه .. ف شغلتك دي حرام !! نيجي هنا نبقي نقوله لا دي منفعة عامة .. تستحيل الحياه دلوقتي بدون عربيات حتي لو في ناس بتموت بسببها .. دي منفعة عامة الناس كلهم بيستفادوا منها .. الأنترنت .. تستحيل الحياه من غيرة دلوقتي حتي لو في شباب بيبوظوا بسببة وحتي لو في بلاوي بتحصل بسببه .. بس دي منفعة عامة الناس كلهم بيستفادوا منه ف الشركات او ع المستوي الشخصي
شوف كدا اللي انت بتعمله دا لو منفعة عامة .. تبقي انت أخلاقي ..

4-التعميــــــم : د.شريف قبل كدا كان رايح الجامعه بالعربية بتاعته والطريق كان واقف بس الناحية التانية كانت فاضية .. بالظبط كدا واحد عبقري من سواقين الميكروباص عدي الناحية التانية ومشي عكسي واحد قلده ومشي زيه العربيات كلها قلبت الناحية التانية والأتجاه التاني وقف .. هنا بقي كل واحد عمم وقال : ما الناس كلهم كدا عادي يعني ع الاقل لو الطريق مفيش منه أمل ممكن الواحد يروح من الناحية التانية .. لا دول قفلوا الأتجاهين .. بسبب التعميم زي لو حد رمي ورقة وقال الناس كلهم بيعملوا كدا .. هنعيش ف سلة مهملات كبيرة شوية جرب كدا لو مش بتعمم وبتعمل الصح مهما كان .. يبقي انت أخلاقي ..

5-الإعـــــــلان : واحد اعد جمب زميلة ف الفصل راح اخد (سرق) القلم بتاعه من غير مايعرف .. يقدر يقوله انا اخدت القلم ؟؟ .. لا طبعا .. يبقي دا غير اخلاقي كام واحد فيكوا هنا سرق قلم من صاحبة ؟؟ .. طبعا محدش هيقول عشان دا تصرف غير اخلاقي .. لو اخلاقي كان كل واحد قال انا عملت كذا وكذا ومش هيبقي فيها كسوف او احراج
جرب بقي كدا شوف الحاجة اللي بتعملها دي تقدر تقول انك عملتها ولا بتخبي .. لو تقدر تقول يبقي انت أخلاقي ..

قولت ل د.شريف بعد المحاضرة .. ينفع ندرس العلم دا ف كل كليات مصر مهما كانت .. قالي ياريت بس مين اللي ياخد الفكرة دي وينشرها وقولتله كمان ازاي احنا مسلمين مش بندرس العلم دا مع انه اساس دينا .. والغرب اللي معظمهم مش مسلمين بيدرسوه للناس قولتله مش المفروش احنا الأولي بتدريس العلم دا .. قالي صح عشان كدا لازم نتعلمة حتي لو مش تبع الحكومه .. ناخده احنا برا كورسات او دورات او كتب نقرأها .. ونتعمل ازاي نعامل الناس زي ماكان النبي صلي الله عليه وسلم بيعاملهم

ايه الفايدة بقي من الموضوع دا كله ؟؟؟
فكروا كدا ؟؟؟

حجات كتير اوي ممكن تكونوا شايفنها مفيدة من دراسة الموضوع دا
بس فيه هدف اكبر واسمي اورقي من كل حاجة .. وهو :
(كـــان الله في عون العبد .. مادام العبد في عون أخيه)
عامل الناس زي ماربنا يحب .. ربنا هيعاملك زي مابتعامل الناس

أسف للأطالة بس متهيألي ان الموضوع مهم جداً ويستاهل اننا ندرسة ونقرأه ونتعامل بيه الكورس لسا ليه 4 محاضرات .. ودا لينك لتعرفوا أكتر
http://www.zedny.org/ar/Ethics.asp

جزاكم الله خيراً
وصلي اللهم على سيدنا مُحمد وعلى أله وصحبه وسلم

جزاك الله خير يا حمادة و الله كل الكلام دة هو ديننا ولو التزمنا بالدين ل مشاكلنا هاتتحل

جزاك الله كل خير حماده
والله كلام حلو جدا ومفيد اوي وطبعا بيه كل حياتنا تتغير
شكراااااااااااااااا

فعلا يشورى مرسي جدا علي كلامك
شكرا دونيا وباذن الله كلنا نتغير للاحسن

جاااامد يا بركه والله
وفعلا يا شورى زي مانت قولت ان كل دا موجود عندنا في الدين بس للاسف احنا دايما نهتم بالدراسات و اقوايل علماء النفس مثلا او علماء الغرب على ماننتبه لشئ
وااخر حاجه نفكر فيها هو اننا ناخد العلم من ديننا للاسف
لكن احنا هنا عشان نعمل كده وشكرا ليك يا بركه مره تانيه عالموضوع و الى الامام