(مشكلتي) ماكنتش اتمنى حالي يكون كده

اختي العزيزه اولا انا اشكرك جدا جدا بجد على ثقتك فينا و انا أؤكدلك انه لا يمكن اكتشاف شخصيتيك نهائيا باذن الله
اما عن المشكله
فأنا بجد شايف انك لازم تبعدي عن الشخص دا بجد
انتي عايزاه ليه ؟؟؟ حب و الكلام دا كله؟؟؟بصي ... انا هكلمك عن نفسي و اسف على الاطاله مقدما
اما عن نفسي فانا كشاب اقول ان اي شاب يوافق انه يمشي مع بنت و يحب فيها و تخرج معاه و يعرفها من ورا اهلها ويرضى انها تخرج من ورا اهلها فدا واحد بيعيش حياته و فرحانه بواحده بتقوله بحبك و مجرد ملياله فراغ كبير في حياته لكن انها تكون ملكه سدئيني انا عن نفسي يوم ماهعمل كده مستحيل اخليها ملكي في يوم من الايام او اتجوزها عارفه ليه؟؟؟؟؟؟؟؟
انا كلامي ممكن يكون مجرح ليكي شويه لكن هوا اللي هيفوقك
على طول هقول في اقرب مشكله بيني وبينها دي واحده ضحكت و كدبت على اهلها اللي ربوها و كبروها و علموها و ادولها اللي مستحيل انا لو عملت ايه اديهولها مش هتضحك عليا انا و لا مش هتكدب عليا انا
وفعلا هنا ينطبق المثل اللي بيقول اللي مالهوش خير في اهله مالهوش خير في اي حد تاني
ومهما طالت علاقتكم انا شايف ان نهايتها و مصيرها الوحيد هو الفشل مالهووش تاني
احسنلك بدل ماتبقى الفشل و الانكسار و المذله وسط اهلك فأخرجي منها دلؤتي بكرامتك
ولو عالطريقه : تقدر تكلميه بكل صراحه و كل وضوح و تقوليله كل الكلام اللي انا اولتهولك دا و قوليله الخطوه الجيا بين ايديك انتا
لو عايزني بجد انا مش مستعده اعرف حد من ورا اهلك تعالى اطلبني في النور و لو طلبت مني غير كده يبقى انت فعلا اثبتلي انك مش بتحب و انك بتتسلى ( و كفايا عليه الكلمتين دول ) وهو لو شاب كويس هيسيبك في حالك
و انتي ممكن تقوليلي انت كشاب بتعمل باللي انت بتقول عليه دا ؟؟ هقولك ولله الحمد عمري مامشيت ولا حبيت واحده اساسا لأني يوم ماهنوي بأذن الله هكون وسط اهلها من اول يوم و بجد انتي تقدري تقوي نفسك هنا معانا و تقربي مننا اكتر انا ماعرفش انتي مين والله بس مهما كنتي تقدري تقربي من اخواتك هنا اكتر و اوعدك باذن الله اننا نملى الفراغ اللي كان شاغلهولك هوا على اد مانقدر و انا اول واحد معاكي و طبعا ربنا قبل كل شئ و اسف جدا بجد عالاطاله و اتمنى اكون وفقت في مساعدتك اختي و انتظر ردك القادم بأنك نهيتي عالمشكله بالفعل باذن الله

الكلام بيكون سهل بس الفعل صعب بس مش على اى حد
بمعنى انا مش هختلف عن الى احمد قاله فى انك لازم تسبيه
لكن للاسف ممكن ده يتوقف على درجه تعلقق بيه ودرجه سيطرتك على نفسك
انت ممكن يتهيالك انك متقدريش تبعدى عنه بس والله تقدرى لو قويتى على نفسك اوى
وبجد لو نويتى الخير ربنا هيقويكى
ومن غير لوم ولا عتاب لنفسك اكتر من اللازم ناو اخرجى الاول من المشكله وبعد كده ابقى ازعلى براحتك واعملى كل الى انتى عايزاه
المهم ناو انك تعرفى ازاى تخرجى نفسك من الموضوع ممكن كمان متحتاجيش انك تشرحى الاسباب دى كلها للود تكتفى بانك تبعدى لانك لو قولتيله انك هتسبيه هيقنعك بمليون سبب انه مينفعش وساعتها ممكن تضعفى علشان كده مش عيزاكى تقوليله انك تسبيه سبيه وخلاص
اما بقى انك ممكن تفكرى انك بنت وحشه او كده اياك تفكرى كده او انك تحملى نفسك فوق طاقتها
الى غلط ويصلح غلطه ويتعلم منه بيقى كويس جدا
وخلى الحكايه الى انتى عيشاها دى كلها دافع ليكى ميكونش عليكى
اتعلمى منها ازاى تقوى نفسك وتستخدمى عقلك اكتر وقفى قلبك ناو خالص متحاوليش تستخدميه
هتحسى بملل وفراغ مش مهم خلى ده يبقى هدف حياتك هسيبه يعنى هسيبه حتى لو هتعذب مش مهم
فى الاول وفى الاخر انت الى بتظلمى فى نفسك قبل اى حد
وكفايه انك كتبه المشكله وانتى اصلا اكيد عارفه حلها من الاول بس مفيش مانع نقوى ببعض
لو كل الكلام ده بقى معجبكيش يبقى خلى قدامك ربنا وشوفى لو ده يرضيه اعمليه
وخليكى مقتنعه تماما انه لو مكتوبلك هيبقى نصيبك لو اتفرقتو العمر كله
اما بقى المصيبه الكبرى لو وانتى بتقوليله كده وقاللك طيب نبقى صحاب بجد اياك حتى تقبلى تسمعى اللمه دى منه
والموضوع ده بالذات هو الى هيبنهولك اذا كان انسان وحش ولا كويس
بس كمان قبل ما تعملى حاجه زى كده وتكلميهخدى احتياطاتك يعنى لو معاه حاجه ليك
مش هقدر افسر اكتر من كده بس حاولى تاخديها الاول وبعد كده سبيه
ومتضعفيش بليزززز بليزززز بجد

بجد انتو غايه في الجمال و الروعه
والله انا بحبكم اوي بجد بحبكم بحبكم جدا جدا و مش عارفه اقولكم ايه
و كل اللي اقدر اقولو ان مشاركتكم معايا هي اللي بتشجعني و هتشجعني والله
و ربنا يخليكم ليا وشكرا ليك اوي اوي ياحمد و ليكي يانورا وليكي يا اختي الكبيره اوشين هارت بس انا اسفه مش هقدر اديليك اكتر من اننا في جامعة واحده لان ساعتها هكون بعرف نفسي ليكم انا متشكره اوي اوي بجد و في انتظار اراء الاعضاء التانيه لأن في منهم اراء بجد تهمني اوي

جميل يا حبيبتى ان انتم فى الجامعه انا بحسبك اصغر من كده

فاضلكم كتير فى سنه كام يعنى

لازم ناخد الامور ببساطه وواحده واحده علشان نوصل لحل كويس وسليم


ممكن يكون انسان كويس ويكون ليكم نصيب فى بعض مش عايزين اراء قاطعه نرجع نندم عليها


لكن كل اللى عايزاه منك صلاة استخاره ارجوكى

لوكان الشاب ده فيه خير ليكى ربنا حيوفقنا كلنا لحل مناسب وسليم

ولو كان مش خير ان شاء الله ربنا يحلها من عنده

انا من رأيي ان مهما كانت هي في سنه كام و هو في سنه كام ماينفعش يستمرو من ورا اهلها

و انا معاكي فعلا طبعا يا اختي انه ممكن يكون شاب كويس و اننا ماينفعش ندي اراء قاطعه

ودا اللي انا خدت بالي منه في ردي لما اولتلها تقوله انك لو عايزني بجد تيجي و تطلبني من اهلي

اصل انا شايف ان مهما كان حتى لو اودامه شهر لازم يتقاله كده لأن يوم واحد معاه بنفس الاسلوب من ورا اهلك

انتي كده تكوني بتخسري نفسك وبتغلطي في حق اهلك

و الباقي كله في ايده هوا دلؤتي انا شايف ان مافييش في ايديكي اي حل

و الحل كله معاه هوا و مهما كان الحل اللي عنده يستحيل الاستمرار بنفس الوضع

يا احمد انا برد على الاراء اللى قالت تسيبه خالص

لازم تعرف الظروف كلها علشان تحل صح

انت نسيت خطوات التفكير العلمى ولا ايه

ده انا اللى بعيد عن الدراسه من سنين لسه فكراها

وانت بالذات اللى حتساعدنا لانك ولد يعنى حنحتاج خبرتك ببنى جنسك

انا ما قلتلهاش غير اننا نعرف ظروفه وتصلى استخاره

وما تشوفهوش لحد ما نوصل لحل مناسب مع انه واضح انه زميلها يعنى حتشوفه حتشوفه

يبقا نلاقى حل مناسب افضل

ماشاء الله عليكي انا مش فاكر كانت في ايه اساسا من ساعة مادخلت تجاره نسيت كل حاجه

و انتي كلامك صح طبعا وانتي هنا اكبر واحده فينا واتمنى اننا نستفيد من خبراتك و انك تقفي جنبينا كلنا و بأذن الله نقدر نوصل معاكي لحل نهائي للمشكله

انا هقوليك بكل صراحه
هو لسه اودامه مشوار بتاع 4 سنين على مايعرف يتقدم اساسا على الاقل
لأن ولا معاه شقه و لا اي شغل مضمون و لسه طالب اساسا فأربع سنين دي اقل حاجه للأسف
المشكله اني لما بتعامل معاه بتعامل بكل قلبي و انا عارفه ان عقلي بيقولي ان نهايتها مستحيل تكون الاستمرار
بس بجد المشكله اني بحبه جدا بجد

عزيزتى صاحبه المشكله انا بشكرك جدا جدا لثقتك الغاليه دى وانا مش هطول عليكى
طبعا احمد ونورا واوشين هارت قالةا حاجات كتير جدا صح ولازم تتعمل
بس انا هقولك حاجه بجد بصى خليكى قويه الاراده وعندك عزيمه انك تقدرى تسيبيه
وصدقينى لو نويتى ربنا هيساعدك بجد عن تجربه بامانه والله بتنفع
انوى انتى بس وسيبيها على ربنا واعملى اى حاجه تنسيكى
روحى لاصحابك اقعدى معاهم وارغوا واتكلموا او اخرجوا حتى
صدقينى هتقدرى وانا واثقه انك هتقدرى هتبقى صعبه شويه فى الاول لكن بعد كده
هتتعودى وبجد انا بدعيلك انك تقدرى فعلا تعملى ده وربنا بجد معاكى ويقويكى
اسفه على الاطاله

اختي اللي كتبت المشكله بجد كل اللي قبلي قالوا والله كل اللي كنت عايزه اقوله
وراي احمد برضه هو اكتر راي عجبني وكنت هقوله لانه شاب ووضح لك تفكير الشباب ايه
والحل بجد اللي ان شاء الله مش هيكون فيه ندم هو انك صخ تقوليله زي ما احمد قال ووالله ساعتها هتعرفي هو فعلا بيحبك ولا لاء
وكمان بتقولي انه قدامه اربع سنين ودا خقيقي كتير اوي وشايفه ان مينفعش تفضلي في علاقتك دي معاه من ورا اهلك ولمده اربع سنين كمان
ففي الاول والاخر بجد علاقه مش صح خاااااااالص
طبعا انا اصغر منك وانا اصغر واحده في كل اللي اتكلمو بس حبيت اقول رايي في الاراء اللي اتقالت ومقدرش اضيف عليهم واتمنى انك تتقبلي رايي وبجد والله اتمنى لك يارب اللي فيه الخير ليكي

فعلا زي ما اختنا الكبيره قالتلك هي جابتلك الكلام اللي من الاخر بجد

السلام عليكم
انا شايفه الاعضاء اللى قابلى ماشاء الله قالو كلام جميل ويارب تقتنعى بيه
وصدقينى هو لن يتزوجك حتى لو كانت ظروفه مناسبه
هو دلوقتى بيقول بنت سهله واهلها مش منتبهين لتصرفاتها
معلش سامحينى انتى دلوقتى تجعلى صوره اهلك فى نظره صوره مش كويسه
اتركيه حالا ولو هو يريدك سوف يتقدم لاهلك ويكون كل شىء فى النور حتى لو كان المشوار امامه طويل

ربنا يهديكى يارب

السلام عليكم
انا عارفه اني ردي متاخر جدا جدا
بس حبيت احكي لصاحبه المشكله انا متزوجه واريد ان احكيلك عن تفكير الرجل بمن يتمانها زوجته يتمني ما حد شافها او عرفها قبله وان تكون كنسمه وملاك تكون لها زوجه وام واخت وحبيبه اريد ان اقولك زي ما الكل قال علاقتك بيه خطا وغلط وخاصه ان اهلك مش عارفين؟ انت الان خايفه من اهلك م خفتي من رب العالمين اللي بيشوفك وانت بتخوني ثقه اهلك بيك اتقي الله في اهلك اللي ربوك وحط ثقتهم فيك افرضي اخوك او ابوك شافك شو ح تكون ردة فعلك او ردة فعل صديقك اقولك علي رده فعله ح يقولك خلاص اهلك ما حبونيش عشان هو انفضح اصلا؟ نصيحتي ليك عزي نفسك ربي يعزك ولو صح بيحبك يصبر عليك.
هو الحب ده بتعملو بيه ايه هل في مشاكل عائليه بتحلوها او تنقاشو ميزانيه البيت بلاش انتم مش متزوجين لو بيحبك صارحيه عن رايك قولي لها ح نفضل نحب بعض بس بدون مقابلات وكلام ,هو اصلا اللي انت بتعمليه حرام عند ربنا ده شخص اجنبي بتحكي معاه, بس وربي يعينكم ولو كان نصيبك ح يجيلك ما تخافي , انا الحمدلله تزوجت زواج تقليدي ولم اكن اعرف زوجي ابدا بس كنت بدعي الله طول عمري ربي يرزقني بالزواج الصالح التقي الراضي والحمدلله اعيش اروع قصه حب مع زوجي اريد ان تكوني هكذا الحب مع الزواج افضل واجمل وارواع وربي يرعاك ويحفظك يارب وسامحيني لو كنت قاسيه عليك انا اكبر منك سنا اعتبريني اختك.
ربي يبعد عنك كل شر ويهديك.