صح وغلط وقصه طريفه (( متجدد ))

شكرا يا جماعه على المتابعه
ولسه هنقابل احاديث كتييييييييييره ضعيفه ومشهورة جدااااااااااااااا

معلش حلقة انهارده يمكن طويله شوية صغيرة .. بس قلت نفضفض بدل ما يحصلي حاجه......

1- صح :-

قيام الليل
التراويح والتهجد
ايه اخبارك مع قيام الليل ؟؟ ايه اخبارك مع التراويح ؟؟
والله الحمد لله .. يعنى عندنا شيخ ربنا يباركله
Zenon شيخ
Turbo شيخ

ظابط وقته بالفمتو ثانية .. العشاء وال 11 ركعة تراويح في ثلث ساعه
الركعة بآية ولو الآية طويله بيقسّمها على اتنين
الحمد لله مبنتعبش خاالص من طول الوقفة
بس المشكلة اننا بنروّح بيتونا عضلاتنا شادّه من سرعة الحركات .. لما بنسلّم من الصلاة تلاقي كله بينهج !!!ا

طيب ده ايه الكلام ده ؟؟ فيه فعلا ناس كده ؟؟
نعم .. فيه عندنا مسجد بدون مبالغة بيكون خلص تراويح بالوتر قبل ما المسجد اللى بنصلي فيه يكون أقام لصلاة العشاء
يا جماعه صلاة قيام الليل تسمى قيام .. بنقوم فيها يعنى .. يعنى المستحب نطوّل شوية في القيام
احنا مش رايحين نعمل ايروبيكس ومروحين بيوتنا تانى
قال رسول الله صلى الله عليه وسلم :-
من قام بعشر آيات لم يكتب من الغافلين ، ومن قام بمائة آية كتب من القانتين ، ومن قام بألف آية كتب من المقنطرين "
الحديث معناه أن من صلى فى قيام الليل بعشر آيات لم يكتب من الغافلين في هذه الليلة ، ومن قام بمائة آية كتب من القانتين أى من الطائعين الخاشعين ، ومن قام بألف آية كتب من المقنطرين أى من جاؤوا بقناطير من الحسنات
فأقل شئ ألا نُكتب من الغافلين .. وفي رمضان ينبغي ألا نفوّت صلاة التراويح -قيام الليل- وفي غير رمضان ليس أقل من نصلى ركعتين بعشر آيات حتى لا نكتب من الغافلين
فاحرص على المساجد اللى بتصلي بجزء في التراويح .. وجزءين أو ثلاثه في التهجد
ده شهر اجتهاد في القيام .. ويمكن لما نصلى التراويح بجزء والتهجد بجزءين نبلغ ال ألف آية ونكتب من المقنطرين والقانتين .

____________________________________

2 - غلط :-

جزء غلط انهارده مش حديث .. اقرؤا وانتوا تعرفوا
شهر رمضان هو شهر الصوم .. وشهر القيام
للأسف هناك من المسلمين من يضيّع القيام في شهر رمضان
مبيصليش اى قيام ليل في رمضان
لا تراويح ولا تهدج
تهدج اه ..
واحد صاحبي من يومين بيقولى : هو الصلاة التهدج ديه بقى بتبقى امتى
قلتله صلاة ايه ؟؟ قالى تهدج
ماااااا علينا
طيب هل فعلا فيه حد ممكن يكون رمضان عدّى كله عليه ومصلاش قيام ليل ولا مرة ؟؟
للأسف اه
واحد زميلي بيقولي .. بقالى 3 سنين مصليتش تراويح ولا مرة !!!
والمشكلة انه مش مثلا تارك للصلاة أو مفرّط .. لا
بيصلي كل الفروض -في رمضان وفي غيره - وفي وقتها إلا الفجر لأسف

ومحافظ على الصلاة وده انا عارفه وبشوفه
طيب يعنى لو واحد تارك للصلاة قال كده .. كنا نقول ممكن .. لكن واحد مُصلّي وبقاله 3 سنين مصلاش تراويح ولا مرة !!
وللأسف السنة ديه برضه لحد دلوقتى .. ولا مرة .. رغم انى تقريبا بقوله كل مبشوفه
ومش سايبها عِند .. بس كسل ..لأنه بيقولى أنا زعلان من نفسي جدا
يعنى ممكن يبقى ناوى يصلي وعايز يروح يصلي بس يكسل

مره من سنتين .. واحد صاحبي - غير اللى فاتوا - قالى
بص انا بقه السنة ديه معاك في صلاة التواريح كلها .. كل يوم معاك
قلتله صلاة مين ؟
قالى التواريح - وده غير الأولاني بتاع التهدج- !!ا
قلتله خلاص يا سيدي .. انت معايا في صلاة التواريح
الكلام ده قبل رمضان بيوم او اتنين مش فاكر
اول يوم اشوف وشه بعدها كان يوم 25 رمضان

قلتله يعنى لا شفت وشك لا ف تواريح ولا ف تفاريح
بص احنا نقضي اللى باقى تواشيح !!
للأسف ده واقع .. فيه كثير من المسلمين صلاة القيام في رمضان ضايعه منهم
فما بالكم بغير رمضان .. الله المستعان
قال رسول الله صلى الله عليه وسلم عن عبد الله بن عمر - الحديث ده صحيح محدش يفتكر انه غلط -
" نعم الرجل عبد الله ، لو كان يصلي بالليل . قال سالم : فكان عبد الله لا ينام من الليل إلا قليلا ."
فلنحرص على قيام الليل خصوصا في رمضان
فكما قال رسول الله صلى الله عليه وسلم :
أفضل الصلاة بعد الفريضة صلاة الليل

فلا نضيع هذه الصلاة العظيمة .. وأهم صلاة الليل صلاة الوتر ولو ركعة واحدة بسورة الإخلاص
لازم نحافظ إن شاء الله على قيام الليل .. ونشجع اللى نعرفهم على قيام الليل .. نحاول واحنا رايحين ناخد حد معانا من صحابنا اللى ممكن يكونوا مبيصلوهاش
بس تفهمومهم الاول انه رايح يصلي التراويح .. مش التواريح

________________________________________

3- قصة طريفة :-

بمناسبة قيام الليل
قال ابن الجوزي -رحمه الله- :-
" وتذاكر قوم قيام الليل وعندهم أعرابي ، فقالوا له : أتقوم بالليل ؟ قال : أي والله ، قالوا : فما تصنع ؟ قال : أبول وأرجع أنام " !!

بيقوم يدخل الحمام ويرجع ينام !! هي ديه فكرته عن قيام الليل !!
المشكلة بقه الكبيرة .. ان بجد
فيه ناس بيننا .. فاهمين قيام الليل غلط
بس مش فاهمينه انه يقوم الحمام ويرجع ينام .. لا فاهمين صلاة قيام لليل غلط ..

ايه بقى الكلام ده ؟؟ ازاى يعنى ؟؟

من 3 ايام بالظبط - مش عارف ايه حكايتي في الحلقة ديه عمّال احكي مواقف -بقول لصاحبي اللى كان بيقولى من سنتين عايزين نصلي تواريح : انت معايا انهارده ومش حتفلت مني
قالى لا مش حينفع انهارده .. طيب انت بتصلي فين ؟؟
قلتله ليه ؟؟ قالى :قول بس بتصلي في جامع ايه ؟؟
قلتله : قلي ليه الأول ..
قال : يمكن يكون نفس الجامع ، اصل فيه بنات صحابي رايحين يصلوا في جامع وقايلينلى اروح اصلي معاهم !!!!!!!!!!!
فهمتوا بقه ازاى ان فيه ناس بيننا فاهمين قيام الليل غلط
!!!
انا فعلا اتثبتت .. مكنتش مستوعب اللى هو قالهولى
كل اللى عرفت اقوله :
طيب وهو الصلاة في المسجد ده بـ
Minimum charge
ولا ببلاش ؟!؟

فيه ناس بقت فاكره ان التراويح في رمضان ديه .. خروجه

يعنى انهارده احنا خارجين ر ايحين نصلى التراويح .. فيه شيخ هناك انما ايه .. صوته
WOW
تحفه .. سارة ومروة وحماده وكريم حيتبسطوا جدا
يا جماعه مينفعش الكلام ده !!!
واللى ياخد خطيبته لوحدهم ويروحوا يصلوا ويرجعوا تانى مع بعض
مينفعش !!
لازم نفهم يعنى ايه قيام ليل .. ايه حكمه وبنعمله ليه ؟
قيام الليل سنّة .. يعنى مينفعش نعمل الحرام علشان نروح نعمل سنة .. مينفعش
وقيام الليل بنعمله عبادة لله .. مش راحين خروجه .. مش رايحين نسمع صوت ونمشي علشان نتمزك .. مش رايحين تأدية واجب علشان نقول لصحابنا صلينا تراويح انهارده عند الشيخ فلان اللى صوته ايه حكاية .. لازم تجربوه
يا جماعه ديه مش حفلة عمرو !!
ديه تراوييييييييييح .. قيام ليل
مش رايحين علشان الدعاء بتاع الوتر !!
والله انهارده واحد بقوله الشيخ فلان حيصلي التهجد في المكان الفلاني بعيد جدا
احنا نروح نصلي تهجد في مسجد كذا بقه هناك الشيخ قراءته طيبة
قالى بس دعاء الشيخ فلان مفيش زيه
قلتله ياعم خليك في القراءة المهم القراءة
قالى : لا بصراحه الدعاء عندي اهم من القراءة
الله المستعان .. يعنى ناس بتروح علشان تسمع الدعاء وتعيط مع الدعاء .. اللى هو كلام الإمام .. كلام إنسان .. اللى كثير من العلماء كرهوا الإطاله فيه على الهيئة اللى بيفعلها كثير من الأئمة دلوقتى
ومش مهم عنده القراءة اللى هي كلام الله
اللى هي أصلا قيام الليل
لازم نفهم يعنى ايه قيام الليل .. وبنعمله ليه
ميبقاش فكرتنا عن قيام الليل ..
زي الأعرابي

حلقه النهاردا جميله ومفيده يساره
بس كنا محتجنها فرمضان دى
بس موضوع جميل جدا مرسي كتير على مجهودك

hamada baraka كتب:: حلقه النهاردا جميله ومفيده يساره
بس كنا محتجنها فرمضان دى
بس موضوع جميل جدا مرسي كتير على مجهودك

ان شاء الله نستفاد من السلسه دى رمضان القادم
بلغنا الله واياكم رمضان المقبل
شكرا للمتابعه

1- صح :-
صلاة الوتر
تسأل واحد : بتصلي صلاة الوتر ؟؟
مم صلاة الوتر .. مش ديه اللى الامام بعد مبيخلص ال 8 ركعات فى التراويح يروح قايل صلاة الوتر إن شاء الله وتلاقى نص المسجد مشي ؟؟
اه هي ديه .. بتصليها ؟؟
لا بصراحه أصلي تبع النص اللى مشي
طيب بتصليها في البيت ؟؟
بيت ؟! يعنى ايه بيت ؟! هو انا حصلي تراويح في الجامع وارجع اصلي الوتر ديه في البيت كمان ؟!
.................................
بعد رمضان بشهرين مثلا .. نقابل حد من صحابنا

ايه اخبار صلاة الوتر معاك ؟
وتر ؟! وتر ؟! انا سمعت الاسم ده قبل كده .. سمعته فين ياربي .. سمعته فيييين ؟!ا
مش ديه تقريبا الصلاة بتاعت رمضان اللى بتبقى بعد ال 8 ركعات في التراويح ؟
!!!!!!!!!!!!!!!!!!!!
الفكرة ديه ممكن تبقى عند كثير من الناس .. ان صلاة الوتر ديه مش مهمه .. او انها خاصة برمضان
طيب ايه الصح ؟؟

الصح ان صلاة الوتر ديه مهمه جدا .. وهي اهم صلاة تقريبا في قيام الليل

فالرسول عليه الصلاة والسلام
لم يكن يترك صلاة الوتر لا في الحضر ولا في السفر
حتى في السفر الذي تقصر فيه الفروض ويُترك فيه بعض بعض السنن الرواتب لم يكن يترك صلاة الوتر
قال رسول الله صلى الله عليه وسلم :
" اجعلوا آخر صلاتكم بالليل وترا "

يعنى اللى بيسيب الإمام قبل صلاة الوتر ويمشي لغير علة - يعنى موراهوش حاجه ومشي كده من غير سبب-
ومبيصليهاش حتى في البيت مخطئ

لإن الرسول صلى الله عليه وسلم أمرنا بصلاة الوتر
واللى فاكر انها في رمضان بس غلطان .. ديه طول السنة
وسنّة مؤكده طول السنة مش في رمضان بس
وحتى إن نمت عن الوتر
قال صلى الله عليه وسلم :
من نام عن وتره أو نسيه فليصله إذا ذكره
طيب الوتر ديه كم ركعة ؟؟
أقلها ركعة .. ومش محدد لها عدد معين .. يعنى حتى لو ركعة بس تصليها قبل متنام
يبقى نحافظ على هذه الصلاة المهمه جدا .. سواء في رمضان أو غير رمضان
ركعة واحده حتى قبل مننام .. طووووول السنة مش رمضان بس
___________________________________

2 - غلط :-

واحنا في شهر رمضان كثير بيمسك المصحف ويقعد يقرأ
تيجى بعد صلاة الظهر في المسجد
تبص تلاقى واحد قاعد وفاتح المصحف وباصص فيه
تقول ما شاء الله .. الراجل بيقرأ
تستنى يقلب الصفحه .. أبدا
دلوقتى حيقلبها .. مفيش .. طيب هو بيحفظ ؟!؟
لو كان بيحفظ كان زمانه ختم

الفضول حياكلك .. رحت وسألته:
هو حضرتك فاتح المصحف على الصفحتين دول خصوصا ليه ؟؟ بيفكروك بحاجه ؟
يرد : لا مش على دول خصوصا .. أنا عادي فتحت اى صفحتين عادي كده
طيب حضرتك بتعمل ايه ؟؟ مبتقراش ليه مثلا
مفيش اصلى قريت عشر آيات بعد صلاة الفجر وحسيت ببعض الارهاق فقلت حكتفى انهارده بالعشر ايات دول
مم .. طيب حضرتك لا مؤاخذه يعنى بتعمل ايه دلوقتى ؟؟
مفيش ببص على المصحف بس
بتبص للمصحف بس ؟؟
اه انت متعرفش ولا ايه ؟؟ شباب اليومين دول اللى مش عارفين اى حاجه دول ..
تعالى يبنى لما اعلمك حديث عن الرسول عليه الصلاة والسلام
قال رسول الله صلى الله عليه وسلم :
" النظر في المصحف عبادة "
..............................
حد سمع الحديث ده قبل كده ؟؟
الحديث ده موضوع
موضوع يعنى مكذوب .. كذب يعنى
وانظر السلسلة الضعيفة للألباني حديث رقم 356 و 1586 و 1710

فنخلي بالنا من الحديث ده ونعرف انه موضوع

__________________________________________________

3- قصة طريفة :-

ذكر ابن الجوزي - رحمه الله- :-
" ذكر أبو الحسين بن برهان : دخلت مرة على بعض أصدقائي وفيهم مريض العين ومعي بعض المغفلين ، فقال له المغفل : كيف عينك ؟ قال : تؤلمني ، فقال : والله إن فلانا آلمته عينه أياما ثم ذهبت ، فاستحييت واستعجلت الخروج "

بيسأله ايه اخبار عينك ؟؟ قاله تاعباني ، قاله : والله اعرف واحد عينه كانت تعباه كم يوم وبعدين راحت(اتعمى يعني)

في أوقات كثير فعلا ممكن تلاقى حد " مدبّ " يعنى بيقول كلام زي الطوب
مبيفكرش في كلامه
الملافظ سعد يا عمنا
عايزين نفكر في كلامنا قبل منقوله للناس .. ساعات الناس ممكن تتشائم مننا
أو متحبش تشوفنا بسبب الكلام اللى زي الدبش ده
وخصوصا لو كان الموقف حساس
زي مرض مثلا .. منعملش زي اخونا المغفل .. لازم نديله أمل
زي واحد ربنا أنعم عليه نعمه.. بلاش نقول كلام يحسسه اننا بنحسده
قدامي مرة واحد اعرفه ربنا انعم عليه برزق .. فبيحط ايده في جيبه لقى فلوس .. قال الفلوس ديه بتاعت ايه
راح حد قايله : اه مهو من كثر الفلوس مبقتش عارف ديه ايه ولا ايه .. فعلا اتضايق جدا من الحد ده وحس انه بيحسده
زي موت لقريب واحد مثلا .. محدش يقوله خلاص متضايقش نفسك ، مهو كان ميت ميت
لازم نراعي كلامنا ونبطل الدبش .. علشان منضايقش حد مننا
ونكرهه فينا

برك الله فيكى يساره
وجعله في ميزان حسناتك

شكرا ليكي يا ساره و جزاكي الله كل خير

جزانا الله واياكم خيرا

1- صح :-

بالأمس تكلمنا عن أهمية صلاة الوتر
وأن نواظب عليها إن شاء الله في رمضان وغير رمضان
طيب بعد صلاة الوتر بنعمل ايه ؟؟
مفيش اكيد بنطلع من المسجد !!
طيب ده في رمضان .. في غير رمضان ؟؟
بطير على السرير

طيب بتقول حاجه بعد صلاة الوتر ؟؟
لا مبقلش حاجه أنا
مبتقولش اى حاجه خالص ؟؟
لا والله مقلت حاجه !!
طيب فيه ذكر المفروض نقوله بعد صلاة الوتر ونحافظ عليه
ممم .. ذكر ... ذكر ايه ؟؟
قال رسول الله صلى الله عليه وسلم :
" كان رسول الله – صلى الله عليه وعلى آله وصحبه وسلم – يقرأ في الوتر : بسبح اسم ربك الأعلى ، وقل يا أيها الكافرون ، وقل هو الله أحد . فإذا سلم قال : سبحان الملك القدوس ثلاث مرات ."
يبقى بعد صلاة الوتر نقول : سبحان الملك القدوس ثلاث مرات
بس كده .. سبحان الملك القدوس 3 مرات .. نحفظ بقه ونقول الذكر ده بعد صلاة الوتر ________________________________________
2 - غلط :-
كثير مننا بيحاول أنه يحافظ على سنن النبي عليه الصلاة والسلام
المشكلة انك اول متيجي تعمل سنّة عن النبي عليه الصلاة والسلام
تلاقى 100 واحد واعظ وناصح
والمشكلة ان كلهم بيحاولوا يخلوك تسيب السنة ديه !!!
الا من رحم ربي
يعنى هما طول عمرهم ساكتين .. واول متكلموا اتكلموا علشان يخلوك متعملش السنن ديه
يبقى الولد عامل في نفسه بلاوى وييجي بقه يلتزم بسنة للنبي
يبنى سيبك من المظاهر ديه .. الدين هنا ... هناااا
ويروح مشاور على الكبد !!!

والبنت اللى تسيبها من اللبس الأى كلام وتلتزم بالزي الإسلامي .. ميت واعظه بقه
يبنتى متعمليش كده .. انت لسه صغيرة .. وشوفي امك لبست حجاب امتى .. عيشي شبابك
واللى تبقى لابسه حجاب اى كلام .. وبلاش افصّل في الحجاب الأى كلام ده علشان الضغط ميعلاش
وحبت تلتزم بالحجاب الصحيح
نفس المواعظ بقه ..و سيبكم من المظاهر
الدين في القلب
يا سيدي

المهم ان نسبة 80% ممكن يقولوا نفس الحاجه
ايه هي ؟؟

يا أخي هو انت فاكر الدين ده مظاهر .. انت بس عامل الناس كويس
يا أخي .. ده الرسول عليه الصلاة والسلام بيقول :

" الدين المعاملة "

.............................

سمعتوا الحديث ده قبل كده ؟؟
بيتهيئلي اى واحد فتح اذاعة القرآن الكريم .. لازم يكون سمعه

تلاقى برنامج يومي .. ييجى راجل برضه صوته تخين - معرفش ايه حكاية الصوت التخين ده-
ويروح قايل :

الدين المعاملة
هذا الحديث .. لا أصل له
ليس بحديث
وانظر مقدمة المجلد الخامس من "سلسة الأحاديث الضعيفة" ص 11 للشيخ الألباني
فهذا الحديث غير صحيح .. لكن المعنى له وجه من الصحة .. كحديث الدين النصيحة
فنعلم أن هذا ليس بحديث ولو سمعنا حد بيقوله .. ننبه على ده
وبهدووووء

___________________________________________

3- قصة طريفة :-

ذكر ابن الجوزي - رحمه الله- :-
" سمع بعض الحمقى قوما يتذاكرون الموت وأهواله - بيذكّروا بعض بالموت- ، فقال : لو لم يكن في الموت إلا أنك لا تقدر أن تتنفس لكفى . "

مش قلتلكم فيه كثير بيحبوا الفزلكة
يعنى لازم يتفزلك ويقول أى حاجه وخلاص .. حتى لو حاجه ملهاش معنى
وبعدين يعنى خلاص .. ساب كل حاجه في الموت وبيقول لو مفيش في الموت غير انك متعرفش تتنفس ده كفاية !!
كثير اوى تلاقى ناس تحب زي مبيقولوا .. ييجي في الهايفة ويتصدر
عايزين نخلي بالنا من كلامنا .. نقول كلام ليه معنى أو نسكت .. علشان محدش ياخد فكرة وحشة عننا
ولو حد واخد فكرة وحشة عن حد فينا .. ميأكدش الفكرة ديه بكلامه اللى ملوش لازمة .. لأ .. يحاول يغير الفكرة ديه
تانى حاجه .. بلاااااااااااش
الإضافات المستفزة
يعنى مثلا .. ميبقاش واحد مأتمنك على حاجه .. وانت ضيعتها .. ضاعت منك
ييجي يسالك عليها .. تقوله
بصراحه معلش انا اسف هي ضاعت منى .. وبعدين يعنى اعتبر انها ضاعت منك او اتكسرت ايه المشكلة يعنى
ايه بقه لازمة الجزء الثاني المستفز ده ؟!؟ علشان ده حصل معايا وكنت حموت فيها
خلاص لو اكتفينا بالجزء الاول انا اسف هي ضاعت منى .. خلاص كفاية .. بلاااش الاضافات المستفزة

ومثلا في حادث الدويقة الأخير في جبل المقطم - رحم الله موتى المسلمين -
يطلع علينا اللى يقول : خلاص احنا سيطرنا على الموقف !!
موقف ايه يا سيدي اللى سيطرت عليه .. يعنى خلاص سيطرت على جبل المقطم وان مش ممكن اى صخور تانى تقع !!

1- صح :-
من بين الحاجات المنتشرة في رمضان بين بعض المسلمين
انك تلاقى المساجد ملياانه في صلاة التراويح .. من كل الناس
.. تلاقى شباب محافظين على التراويح والتهجد كمان في المسجد في جماعه
من الناس ديه ناس بتعمل حاجه غريبة جدا
تسأله ايه أخبارك .. حتصلى الفجر فين ان شاء الله ؟
يرد : بصراحه انا حتسحر وبعدين حصلي في البيت وانام
ليه كده مش حتصلي الفجر في المسجد ؟
لا بصراحه لإنى ببقى تعبت جدا من التراويح والتهجد
طيب وبقية الصلوات بتعمل فيها ايه ؟؟
يعنى ساعات كده ممكن اصلي العصر في المسجد والباقي في البيت لإنى ببقى لسه تعبان من التراويح والتهجد فبنام بقه لحد قبل العصر أصحى اصلى الظهر في البيت والعصر ساعات انزل اصليه في المسجد
المغرب بقه فطار وكل سنة وانت طيب بقعد افطر بقه - مش فاهم يعنى نقفل المساجد في صلاة المغرب في رمضان ؟؟-
والعشاء بصليها بقه في المسجد قبل التراويح
المشكلة انى مره لقيت واحد اعرفه .. بيصلي العشاء في البيت وبعدين ينزل يصلي التراويح في المسجد !!!!
هى ديه بقه الحاجه الغريبة جدا
ان بعض الناس تحافظ على صلاة السنة المستحبة في المسجد جماعه .. وتسيب الفروض الواجبة عليها متصليهاش جماعه
اهو ده من العجب العجيب .. ان تلاقى ناس فاهمه الموضوع غلط
طيب ايه الصح ؟؟
الصح ان الفروض أهم وأولى من السنن
يعنى انك تصلي الفجر وبقية الصلوات في جماعه في المسجد اهم من انك تصلى قيام الليل
و المفترض ان السنن متأثرش على الفروض
قال رسول الله صلى الله عليه وسلم :
" إن الله تعالى قال: و ما تقرب إلي عبدي بشيء أحب إلى مما افترضته عليه و ما يزال عبدي يتقرب إلي بالنوافل حتى أحبه"
يبقى التقرب إلى الله بالفرائض هو أهم شئ .. ومن بعد ذلك نتقرب بالنوافل المستحبات
لكن نتقرب إلى الله بالنوافل على حساب الفرائض
فده من الفهم الخاطئ للتراويح والتهجد ولأمور الدين
فننبه على أن الأوْلى والأهم اننا نحافظ على الفروض في جماعه في المسجد وللنساء في البيوت في أول وقت الصلاة
وده طول السنة مش في رمضان بس .. ونؤكد عليها خصوصا في رمضان
_________________________________
2 - غلط :-
طبعا احنا عارفين اننا في شهر رمضان
وفي شهر رمضان .. يظهر على كثير منا مظاهر الإلتزام
ازاى بقه ؟
يعنى مثلا تلاقى واحد عمره ملبس قميص - جلبيه يعنى علشان محدش يفتكر انه طول عمره بيلبس تيشرتات
ييجي بقه شهر رمضان .. وتلاقى العدّه خرجت
عدّة رمضان
الجلبية ماركة الدفّة والطاقية البيضاء والمسك اللى يحط نص الازازه مرة واحده و أحيانا يجيب السبحة الغريبة اللى مكونه من 200 فص ديه
معرفش بيعدّ بيها ايه !!

وتلاقيه لبس يونيفورم رمضان خلاص
و تلاقى البنت اللى على طول "ربنا يهديها" مش مظبطه ف اللبس يعني .. ييجي شهر رمضان تلبس اليونيفورم
ايشارب وعباية او اسدال ..
الا من رحم الله
مش عارف زي ميكون شهر رمضان هو الشهر الوحيد اللى حيحاسبنا فيه ربنا
وباقى الشهور عادي نعمل اللى عايزين
المهم والواحد بقه عايش الدور ده ولابس اليونيفورم بتاع رمضان
-طبعا مبقولش كده على اللبس نفسه لكن اقصد الناس اللى بتلبس كده في رمضان بس-
و بعد مخرج من صلاة التراويح يروح ماسك السيجارة
ومولع و ياخذ الانفاس بقه
أو البنت أول متخلص التراويح
تخرج تكلم ميمو صاحبها أو تيتي صاحبتها علشان يخرجوا مع الشلة
المكونة من البنات والبنين والهايفات والهايفين

..................
ييجى بقه حد يروح قايل لحد فيهم - للولد أو للبنت - .. على فكرة صلاتك اللى صليتها ديه باطلة
باطلة !! باطلة ليه ياعم بس ؟؟ ده انا لابس الجلبية ماركة الدفة وأول مره أحط مسك
والبنت تقول : باطلة !! ده انا أول مرة أفك التسريحة الكانيش .. ده انا حتى اتوضيت قبل الصلاة
يقوله : أصل الرسول صلى الله عليه وسلم قال :
" من لم تنهه صلاته عن الفحشاء والمنكر فلا صلاة له "
مش سمعتوا الحديث ده قبل كده ؟
أهو الحديث ده .. غير صحيح
الحديث ده منكر
قال عنه الألباني : لا يصح من قبل إسناده ولا متنه - السلسة الضعيفة حديث رقم 985
طبعااااااااااااا فعل الولد والبنت دول غلط .. بس نقول أن الحديث ده غير صحيح .. كذب على النبي عليه الصلاة والسلام
وطبعا لو سمعنا حد بيقوله نبقى عارفين انه غلط .. وننصح اللى بيقوله
بهدوووووء
_____________________________

3- قصة طريفة :-

ذكر ابن الجوزي - رحمه الله- :-

" ماتت جارية لرجل فلما دفنها ، قال : لقد كنت تقومين بحقوقي ، فلأكافئنك ، اشهدوا على أنها حرة "

!!!!

بعد ايه ياعم الحاج ؟!! لسه فاكر
عايزين نتكلم عن حاجه مهمه جدا بمناسبة الراجل ده
هي كما سماها الشيخ : سامي المسيطير "قاعدة الآن "
ايه قاعدة الآن ديه ؟
يعنى لو حد صنع ليك معروف تكافؤه في ساعتها .. متأخرش المكافأه .. لو اخرتها خلاص مش حيبقالها معنى .. وممكن عقبال متيجى ترد ليه الجميل .. يكون فات الآوان
حاجه تانية .. في مناسبات الأخبار السارة وغير السارة وهي كثيره جدا
بيبقى لازم يا نهنئ و نبارك أو نعزي و نواسي
كثير ممكن نأخّر أداء الواجب بحجة أننا نبقى نأديها على الوجه الأمثل
يعنى مثلا تعرف ان صاحب ليك حصله كذا أو كذا .. واحد يقولك تعالى نتصل بيك .. تقول لا تليفون ايه وبتاع ايه
ده حبيبى انا مينفعش اكلمه في التليفون كده
انا لازم اعمل معاه الواجب صح .. لا ده حقه عليا أكبر من كده .. أنا لازم أروح أزوره
واخد معايا 3 كيلو ورد بلدي من أبو شوك علشان يقولي متتعبش نفسك بعد كده
وممكن انت تقول لغيرك : على فكرة فلان حصله كذا كلموه بقه .. وانت لسه مكلمتوش علشان حاسس ان حقه عليك أكبر من كده
فاللى انت تقوله يتصل بصاحبك وانت لسه متصلتش ..
وممكن صاحبك يتضايق لانه عرف انك عرفت ولسه مكلمتوش
رغم انك ناوى تعمل اكبر من المكالمه .. وتتأخر في أداء الواجب
لحد مييجى وقت تنكسف انك تكلمه دلوقتى .. وتقعد تقول خلاص بقه فات وقت الموضوع ده ولو كلمته دلوقتى حيقول ايه
وتلاقى نفسك لا كلمته ولا رحتله ولا أديت الواجب ولا عملت اى حاجه
لأ ... أول منعرف أى حاجه لحد من اللى نعرفهم ... سواء حاجه كويسه او وحشة
على طول بالتليفون نأدي الواجب وبعدين نروحلهم بعديها
على الأقل رسالة بالموبايل
بس نبقى أدينا الواجب في ساعتها .. لأن ده ليه أثر كبير جدا
ونخلي بالنا علشان محدش يزعل مننا
ومنتأخرش زي عم الحاج بتاع أشهدوا أنها حرة ده

اقتباس :: أو البنت أول متخلص التراويح
تخرج تكلم ميمو صاحبها أو تيتي صاحبتها علشان يخرجوا مع الشلة
المكونة من البنات والبنين والهايفات والهايفين

هههههههههههههه ضحكتني اوي الحته دي

ربنا يهدينا يارب و يهدي جميع شباب و بنات المسلمين

جزاكي الله كل خير يا ساره

AHMED كتب:

اقتباس :: أو البنت أول متخلص التراويح
تخرج تكلم ميمو صاحبها أو تيتي صاحبتها علشان يخرجوا مع الشلة
المكونة من البنات والبنين والهايفات والهايفين

هههههههههههههه ضحكتني اوي الحته دي

ربنا يهدينا يارب و يهدي جميع شباب و بنات المسلمين

جزاكي الله كل خير يا ساره

امين يا رب العالمين

جزانا الله واياكم خيرا

1- صح :-

عايزين نسال شاب او فتاه

لما بتصحى الصبح بعد متكون صليت الفجر ونمت وصحيت للشغل مثلا

بتعمل ايه ؟؟

بفتح عيني .. واتاوب .. وادخل الحمام اغسل وشي وسناني كمان

وبعدين اطلع البس وانزل .. ليه حد قالك عنى حاجه ؟؟

يعنى مبتصليش حاجه ؟؟

اصلي ايه بقه منا خلاص صليت الفجر !! حصلى الفجر تانى ؟!؟ كل شوية بقه

لا الفجر ايه .. ما خلاص ..بس فيه صلاة مهمه جدااا

قال رسول الله صلى الله عليه وسلم

" في الإنسان ستون وثلثمائة مفصل فعليه أن يتصدق عن كل مفصل منها صدقة
قالوا فمن يطيق ذلك يا رسول الله قال النخاعة في المسجد تدفنها والشيء تنحيه عن الطريق فإن لم تقدر فركعتا الضحى تجزىء عنك "

الحديث معناه أن فى جسم الإنسان 360 مفصل

وعلى الإنسان أن يتصدق عن كل مفصل .. فتسائل الصحابة ومن يطيق أن يتصدق كل يوم ب 360 صدقة

فأخبرهم النبي صلى الله عليه وسلم أن صلاة ركعتى الضحى تجزء عن ذلك .. أى كأنك تصدقت عن كل مفصل فى جسدك

يبقى نحافظ على صلاة الضحى كل يوم بعد منصحى ان شاء الله او لو كنا لا ننام بعد صلاة الفجر نصليها من بعد طلوع الشمس بحوالى ثلث ساعة مثلا

حافظواااا على صلاة الضحى

________________________________________

2 - غلط :-

أى حد مننا أكيد مقصّر في بر الوالدين

إلا من رحم ربي

واتنين مننا سمعوا كلمة عن بر الوالدين

فبيقولوا لبعض : اتصدق الواحد مقصّر جدا في بر الوالدين

اه عندك حق .. وخصوصا الأم

أنا مفيش حاجه تطلبها منى أمى .. الا وتطلبها تانى

اصلى مبعملش حاجه

انا بقه أمى مبقتش تطلب منى حاجه اصلا .. وعلى طول تقول : أنا مجبتش غير حنان

حنان مين ؟؟

الشغّاله !!

خلاص يأست مننا

hopeless case

لا .. الأم بالذات بقه تخلي بالك

لأن الرسول صلى الله عليه وسلم قال :-

" الجنة تحت أقدام الأمهات "

......................

أظن كلنا سمعنا الحديث ده قبل كده

الحديث ده غير صحيح

هذا الحديث في أحسن أحواله ضعيف
انظر ضعيف الجامع حديث رقم 2666 والسلسلة الضعيفة حديث رقم 593

لكن هناك حديث أخر يغني عن هذا الحديث
الحديث حسّنه الشيخ الألباني رحمه الله :

فالزمها فإن الجنة تحت رجليها

وفي لفظ أخر : الزم رجلها فثم الجنة

وفي لفظ أخر ورد بصيغة المثني -للوالدين- :-

الزمهما فإن الجنة تحت أرجلهما

فلنعلم أن حديث الجنة تحت أقدام الأمهات غير صحيح
و هناك الحديث الأخر الذي يغنى عن هذا و حسنّه الألباني

وبرضه زي مكلنا متفقين .. لو سمعنا حد بيقوله

براحتكوا بقه

_____________________
3- قصة طريفة :-

ذكر ابن الجوزي - رحمه الله- :-

" قال ابن خلف : قصّ قاص بالمدينة ، فقال : رأى أبو هريرة على ابنته خاتم ذهب ، فقال : يا بنيه لا تتختمي بالذهب فإنه لهب ، فبينما هو يحدثهم إذ بدت كفه فإذا فيها خاتم ذهب ، فقالوا له : تنهانا عن لبس الذهب وتلبسه ؟ فقال : لم أكن ابنة ابي هريرة "

بس هما كلمتين
متنهاش حد عن حاجه ويلاقيك بتعملها
ومتنصحش حد بحاجه ويلاقيك مبتعملهاش .. لأن ده بيفقده الثقه فيك
عايزين نحاول نبقى قدوة لغيرنا في الخير .. ومينفعش يبقى حد قدوة وبيأمر بحاجه ويأتي بخلافها
وشئ مهم جدا .. إن لو حد شاف فيك انك قدوة ليه واكتشف انه اتخدع فيك ويلاقيك بتعمل غير اللى بتدّعيه .. بتبقى صعبة جدا عليه وبيفقد كل الثقه
ويمكن يكون سبب في انه يترك الخير ده
نفكر في ده كويس
عايزين ندعو نفسنا للخير وندعو غيرنا ونصدق فيما نقول
وممكن من وسائل الدعوه انك تقول لحد ايه رايك نشجع بعض اننا نبطل كذا او كذا .. او نوصل لكذا .. او نعمل كذا

علشان حتى لو انت مبتعملهاش وبتحاول تعملها ميتخدعش ...
يبقى عارف

1- صح :-

اتكلمنا في جزء الصح عن كثير من الصلوات
تكلمنا عن صلاة الفروض في المسجد وعن صلاة الفجر وعن
صلاة قيام الليل وعن الوتر وصلاة الضحى
ويارب نكون كلنا التزمنا بالصلوات ديه
بس فيه صلاة مهمه جدا جدا ناس كثير برضه مبتصليهاش
ايه هي الصلاة ديه ؟؟ هي صلاة خير من الدنيا وما فيها ؟؟

ايه صلاة خير من الدنيا وما فيها ؟!؟
اه .. يعنى الدنيا كلها وما فيها لا تساوى هذه الصلاة
الصلاة ديه ما كان يتركها الرسول عليه الصلاة والسلام أبدا حتى في السفر
حتى وهو يقصر الفروض ويترك بعض السنن الرواتب
لم يكن يتركها أبدا
حتى لما فاتتهم هذه الصلاة .. صلاها الرسول بعد أن طلعت الشمس
رغم أنها سنة وليست فرض .. حد عرفها ؟؟

قال رسول الله صلى الله عليه وسلم :
" ركعتا الفجر خير من الدنيا وما فيها "

فالمعنى أن من صلى ركعتي الفجر - سنة الصبح - فذلك خير له من الدنيا وما فيها
طيب إذا كان سنة الفجر خير من الدنيا وما فيها
فما بالكم بالفرض ؟؟؟

يبقى زي متفقنا لازم نصحى إن شاء الله لصلاة الفجر في وقتها قبل طلوع الشمس
نصلى ركعتين السنة ثم ركعتين الفرض
اظبط موبايلك .. خلي صحابك يكلموك .. اظبط منبه .. نام وانت صاحي

اتصرف بس نصحى ان شاء الله لصلاة الصبح كل يوم إن شاء الله
في رمضان وغيره
_____________________________

2 - غلط :-
في أوقات كثير أوى .. بيبقى فرح حد من صحابنا أو أقربنا أو حد نعرفه
ونروح الفرح ده .. وقصدي في الفرح ده بقه الأفراح الشرعية مش الأفراح السيكي ميكي.....
في ساعة كتب الكتاب مثلا .. ممكن شيخ أو المأذون يقول كلمه
أو حتى في التلفزيون أو الراديو لما يتكلموا عن الزواج مثلا
أو الإحسان للزوجات
تلاقي كثييييير جداااا يقول حديث مشهور جدا
تلاقى المأذون أو اللي بيقول الكلمة
في وسط كلامه عايز يعظ الرجال بقه .. فيروح قايل :
وقال رسول الله صلى الله عليه وسلم :

" ما أكرم النساء إلا كريم و لا أهانهن إلا لئيم "

مش سمعتوه قبل كده ؟؟

اهو الحديث ده بقه
موضوع
وانظر السلسلة الضعيفة حديث رقم 845 وضعيف الجامع الصغير حديث رقم 2916

يعنى مش صحيح .. مكذوب يعنى
ليس من كلام النبي عليه الصلاة والسلام
وفيما ورد في إكرام النساء والإحسان إليهن من الأحاديث الصحيحة الكفاية إن شاء الله
لكن هذا الحديث كذب

______________________

3- قصة طريفة :-

ذكر ابن الجوزي - رحمه الله- :-
" وعن محمد بن خلف قال : مر رجل بإمام يصلي بقوم ، فقرأ : آلم غلبت الترك ، فلنا فرغ قلت : يا هذا ، إنما هو : غلبت الروم ! ، فقال : كلهم أعداء لا نبالي من ذكر منهم . "

طبعا الكلام ده مينفعش .. هذا قرآن
كلام الله .. تكلم به حقيقة
لازم نعظّم القرآن .. مينفعش نتكلم بالقرآن ونستشهد به في مواطن لا تليق بقدر هذا القرآن
مينفعش نحرّف في كلمة من القرآن علشان نهرج مع حد من صحابنا
مش بس نلاقي اللى بيحافظ على النطق السليم لكل حرف وأحيانا يتقعر في كل حرف
وهو لا يعظّم القرآن ولا يقيم حدوده
زي القارئ في أحد الصوانات اللى بيعملوها ديه
بعد مخلّص قراءة .. عايز ياكل .. مهو جاى اصلا يقرأله آيتين علشان ياخد فلوس او ياكله أكله
داخل يقول للناس اللى جايبينه :
ربنا هب لنا من لدنك لحمه !!
ده كلام مينفعش !! فين تعظيم القرآن
واللى يبقى بيهرج مع صاحبته -ربنا يهديهم ويهدينا - هزار غير لائق حد يعاتبهم وينصحهم يروح مستهزأ وقايل :
هي راودتني عن نفسي !!
واحد قاعد مع صاحبته -ربنا يتوب عليهم- .. تقوله الناس بيتكلموا عننا
يقولها : مادام مبنعملش حاجه غلط منخافش من الناس
ده ربنا قال : فلا تخشوهم واخشوني !!!
يا سيدي !! ده ايه التقوى ديه ؟!؟
الكلام ده موجود وبيحصل .. ديه أمثله لناس لم تعظّم القرآن فأين تعظيمنا احنا
واحد أعرفه- غفر الله له - في بداية التزامه كان اتعلم شوية ازاى يقرأ قرآن .. راح جايب بنتين كان يعرفهم وقعد يعلمهم وقاعدين مع بعض ماسكين المصحف !!
ده كله ينافي تعظيم القرآن .. عايزين نعظّم القرآن في نفوسنا .. مينفعش يبقى تعاملنا مع القرآن زي الأمثله اللى فاتت
مينفعش من احترامنا للقرآن يبقى يافطة مكتوبه على محل عصير : وسقاهم ربهم شرابا طهورا !!
مينفعش تعاملنا مع القرآن ان ميكانيكي يعلق في الورشة بتاعته آية : إن أريد إلا الإصلاح ما استطعت !!
و لا تلاقي الخياط كاتب على المحل يافطه
و كل شئ فصلناه تفصيلا
ينفع كده؟؟!!

مينفعش يبقى آيات القرآن ورق لاصق على ميكروباص لرد حسد أو غيره
مينفعش ان القرآن عند ناس يبقى مجرد مصحف يتحط في العربية علشان البركة ورد الحسد !! ومحدش بيقرأه
حاجات كثير اوى بتحصل واقعنا لازم نخلي بالنا منها .. وننصح اللى بيعملها

ونحاول نغير هذا المنكر وندعو الناس لتعظيم القرآن
كل واحد فينا يفتش في نفسه ويشوف كيف حاله مع تعظيم القرآن ؟؟
كل أب أو أم يزرع في أولاده من صغرهم تعظيم القرآن

ديه أمثله ولو اتكلمنا عن كل حاجه مش حنخلص وحنحتاج حلقات .. وأنا بخاف أطول وبحاول على قد مقدر اختصر
وخلاص متأسفين على الإطاله ..خلاااص

اتمنى كمان اننا نحافظ على جميع الصلوات وايضا الضحى كما ذكرتى
شكرا ساره وبجد مجهود رائع

السلام عليكم شكرا يا حبتى يا ساره ربنا يوفقك يارب ويسعدك
الموضوع ده فعلا بيحصل
وكمان لما نيجى نتكلم وواحد او احده يغلط ف حد قريبه
بنقول"وشهد شاهد من اهلها"فعلا والله
فعلا فعلا ربنا يهدينا والمسلمين والمسلمات اجمعين

شوشوكرا يا ساااااااااااااااااااااره
يارب تطلعى الاولى ع الكليه بتاعتك السنه دى واللى بعدها واللى بعدها لحححححححححححححد ما تخلصى وتبقى دكتوره اااااااااد الدنيا واكبر شويه ربنا يوفقك يارب

اختك ايمان

hamada baraka كتب:: اتمنى كمان اننا نحافظ على جميع الصلوات وايضا الضحى كما ذكرتى
شكرا ساره وبجد مجهود رائع

[color=blue]
يا رب ان شاء الله

شكرا لحضرتك على المتابعه[/color]

فارسه الاسلام كتب:: السلام عليكم شكرا يا حبتى يا ساره ربنا يوفقك يارب ويسعدك
الموضوع ده فعلا بيحصل
وكمان لما نيجى نتكلم وواحد او احده يغلط ف حد قريبه
بنقول"وشهد شاهد من اهلها"فعلا والله
فعلا فعلا ربنا يهدينا والمسلمين والمسلمات اجمعين

شوشوكرا يا ساااااااااااااااااااااره
يارب تطلعى الاولى ع الكليه بتاعتك السنه دى واللى بعدها واللى بعدها لحححححححححححححد ما تخلصى وتبقى دكتوره اااااااااد الدنيا واكبر شويه ربنا يوفقك يارب

اختك ايمان

ربنا يخليكِ يا حبية قلبى يااا رب
وميرسى جدا على الدعوة الجميله جدااااااااا دى
واتمنى تكون السلسله مفيده للجميع

1- صح :-

في أيامنا هذه .. في ازمة كبيرة جدا في الشقق

يعنى الشباب اللى عايزين يتزوجوا أو اللى فقدوا الأمل

عمّالين يدوروا على شقه

والشقق بقت أسعارها غير طبيعية .. وتقسيط على 20 سنة

وبرضه مفيش فايدة

البيت في الدنيا اللى الواحد مننا حيعيش فيها بالكثير يعنى

يمكن 60 سنة كمان بقه صعب جدا أن حد يحصل عليه

واللى اخيييييرا بيعرف يجيب شقة .. حيعيش فيها قد ايه ؟؟

40 سنة مثلا أو 50

طيب محدش فكر ازاى يفوز ببيت يفضل معاه على طول

ازاى بقه على طول ديه ؟

في الجنة .. اذا كان ثمن بيت في الدنيا الفانية اللى ممكن نسيبها في اى لحظة صعب قوى كده

طيب ازاى بقه نفوز ببيت في الجنة اللى البيت فيها بقه مش زي اى بيت في الدنيا ديه

ولا الدنيا ديه كلها كده تساوى بيت في الجنة

علشان نفوز ببيت في الجنة .. الموضوع مش صعب

قال رسول الله صلى الله عليه وسلم :

" ما من عبد مسلم يصلي لله تعالى كل يوم ثنتي عشرة ركعة تطوعًا غير الفريضة، إلا بنى الله له بيتًا في الجنة "

حديث اليوم معناه أن من صلى لله كل يوم 12 ركعة غير الصلوات المفروضة بنى الله له بيتاً في الجنة

فتخيل ما هو الثمن للحصول على بيت الجنة ..

تصلى 12 ركعة تطوع في اليوم .. بس كده ؟! أه بس كده ونسال الله القبول

ركعتين قبل الفجر

اربع ركعات قبل الظهر واثنان بعده او العكس

ركعتين بعد المغرب

ركعتين بعد العشاء

نشد حيلنا ونحاول نحافظ على ال 12 ركعة كل يوم .. خصوصا احنا في رمضان

______________________________

2 - غلط :-

زي مقلنا قبل كده .. كثير قوى ممكن نقابل محبّي الإفتاء

اى حاجه يقعد يفتي وخلاص .. عارف او مش عارف لازم يقعد يفتي

في امور الدنيا او في الدين .. مش فارقه معاه

المهم واحد نفسه يعرف اجابة سؤال عنده .. فقابل صديق ليه من النوعيه ديه

فسأله سؤال التانى جاوبه على حاجه تانية خالص

فواحد سمعهم .. طبعا مش محتاجه يعنى علشان يفهم ان ده عمال يفتي

راح داخل قايله : ياعم حرام عليك .. ايه ؟؟ عماااال تفتي كده وخلاص

ان مسمعتش قول رسول الله عليه الصلاة والسلام :

" أجرؤكم على الفتيا أجرؤكم على النار "

....................

أظن كلنا سمعنا الحديث ده ..

هذا الحديث ضعيف

وانظر السلسلة الضعيفه حديث رقم 1814 وضعيف الجامع الصغير حديث رقم 147

فهذا حديث لا يصح عن النبي صلى الله عليه وسلم .. وإن صحّ معناه

فلو سمعناه نعرف انه مش صحيح وننبه على ده

برفق

______________________________________

3- قصة طريفة :-

ذكر ابن الجوزي -رحمه الله - :-

" وكان أعرابي يقول : اللهم اغفر لي وحدى ، فقيل له : لو عممت بدعائك ، فإن الله واسع المغفرة ، فقال : اكره ان أثقل على ربي "

طبعا هذا خطأ كبير .. في أحيان كثيرة بعضنا يستحي من الدعاء

بيتكسف يدعي بكل اللى هو عايزه .. مش عارف ليه !!ا

وساعات للأسف بعضنا بيحس ان اللى هو عايزه ده كبير قوى

فمبيدعيش .. زي ميكون ده كبير على الله مثلا .. و استغفر الله على ذلك

اى شئ كبير سواء كان خير تريده او شر تريد ان ينصرف

ادع الله

وملكش دعوه

ولا تعجل واستمر في الدعاء .. وفائدة مهمه جدا حبيت انقلها هنا .. هي من كلام الشيخ " سامي المسيطير " حفظه الله

قاعدة مش شغلك

لن أسرد القصة التى ذكرها الشيخ حتى لا أطيل لكن المستفاد

لو وجدت نفسك في مأزق وضاق بك الوقت و جاءت الشيطان ليثبطك وييأسك ويقول أنها خلاص مش حتفرج والدعاء مش حيجيب نتيجة

ويحاول أنه يفقدك الأمل

قل للشيطان : مش شغلك .. ملكش دعوه

قل لنفسك : مش شغلك .. ملكيش دعوه

قل للناس جميعا : مش شغلكم .. ملكوش دعوه

أنا أدعو الكريم ... الرؤوف .. الرحيم ... وهو أعلم بحالي .. وأرحم بي من نفسي ...

يا نفس ... عليكِ الدعاء والصدق مع الله ...

وكيفية الفرج من الله تعالى ... هو يتولاه .. بكرمه ... وقدرته ... سبحانه وتعالى

وملكش دعوه كيف يقضي الله الأمر .. فوض أمرك لله وتوكل عليه .. واحسن الظن ..ثم انتظر كرم الكريم ورحمة الرحيم .. وسترى قدرة القدير

ادع انت بس والح في الدعاء ولا تيأس ولا تعجل ومتقولش دعيت وربنا مستجبش

ممكن الفرج يأتي في أخر لحظة كما في القصة التى ذكرها الشيخ

وإن شاء الله اضع القصة في مشاركة مستقله فيما بعد

الله أمرنا أن ندعوه

الدعاء هو العباده
بالمناسبة حديث الدعاء مخ العبادة غير صحيح

ومتعملش زي الأعرابي .. مفيش حاجه اسمها تثقل على الله ..

1- صح :-

تكلمنا عن كيف تفوز ببيت في الجنة

انهارده معانا فرصة اخرى للفوز ببيت في الجنة

وحاجه سهله جداااا

سبحان الله بيت في الدنيا 100متر مربع الناس بتتعب سنين علشان تحصل عليه

لكن شوفوا رحمة ربنا بنا .. علشان تفوز ببيت في الجنة

عمل بسيط بس محتاجين اخلاص كامل وصبر على الطاعه

قال رسول الله صلى الله عليه وسلم :

" من بنى لله مسجدا بنى الله له بيتا في الجنة"

اعتقد ان الكثير منا يرى ان هذا الامر كبير عليه ولا يطيقه ولكن اذكركم بأن الامر ليس بكثره المال ولكن بالصدق والاخلاص مع الله..فقد تتصدق بجنيه فى بناء مسجد بنيه صادقه ويتقبلها الله منك وغيرك يتصدق بمئات الجنيهات بغير اخلاص ولا يتقبل الله منه

واذكركم بقول النبى صلى الله عليه وسلم..لا تحقرن من المعروف شيئا

ودلوقتى ... كيف نساهم فى بناء المسجد؟؟؟

اغلب المساجد التى نصلى بها ...يوجد بها صندوق لاعمار المسجد...فضع فى هذا الصندوق ما تقدر عليه

وحاول اختيار المساجد اللى لسه بتتبني

وتخيل أنك بعملك هذا إن أخلصت النية وابتغيت وجه الله فلك بكل من يصلى في المسجد أو يذكر الله فيه أجر بفضل الله

ونقطة تانية مهمه جداااا .. حتى لو كان اللى حتساهم به في بناء المسجد حيكفي بناء حتة صغيرة جدا

ففي رواية أخرى قال عليه الصلاة والسلام :

من بنى لله مسجدا و لو كمفحص قطاة أو أصغر بنى الله له بيتا في الجنة

مفحص القطاة تقريبا يساوى موضع جبهة المصلي .. والقطاة نوع من أنواع الحمام ومفحصها يعنى عشها اللى بتبيض فيه

فلا تحقرن من المعروف شيئا .. ونسأل الله أن يتقبل منا

_________________________________

2 - غلط :-

من الحاجات الغلط .. انك تلاقى ناس فعلا نظرتها للحياة سوداء

حاسس ان مفيش في الدنيا خير أبدا

فاضله يومين على الامتحان بتاعه

صاحبه يسأله ايه الأخبار ؟؟ مستعد للإختبار ؟؟

لا مش مستعد ومش عارف أذاكر وكل مذاكر ميجيليش نفس ولو جالي نفس النور يقطع .. اصلي حاسس ان الدكتور حيسقطنى لانه دكتور مش كويس ومش حينجحنى وبعدين المنهج اللى نزل كبير فمشتريتالكتاب ولو جبها مش حلحق أخلصه ولو خلصته مش حفهمه ولو فهمته مش حفتكره ولو افتكرته حيروح عليا نومة ومش حصحى للامتحان ولو صحيت ممكن يحصل حاجه وانا رايح الكلية وانت عارف الميكروباصات ولو محصلش حاجه حروح وحقعد اكتب واحل وفي الاخر

الدكتور حيسقطنى

مفيش فايده !!ا

حنسقط حنسقط .. حتى لو نجحنا حنسقط

طبعا زميله خلاص جاتله حالة نفسية وحيحجز عند دكتور نفساني

بس قبل ميحجز راح قايله :

اييييييييييه ياعم ده كله .. حرام عليك .. ده انا حسيت انى سقطت خلاص .. طيب حنعيد السنة امتى ؟؟

يا أخي .. غلط كده .. تفاءل .. ده الرسول عليه الصلاة والسلام بيقول :

" تفاءلوا بالخير تجدوه "

.................

أظن الحديث ده كثييير جدا مننا سمعه

هذا الحديث : لا أصل له
قال الشيخ الالباني : وهذا بمعنى الحديث المشهور في بعض البلاد :"تفاءلوا بالخير تجدوه".ولا أعرف له أصلاً

وكان النبي صلى الله عليه وسلم كان يعجبه الفأل الحسن

كما في الحديث الذي صححه الشيخ الألباني -رحمه الله-
" كان يعجبه الفأل الحسن ، ويكره الطيرة "

وطبعا زي مكلنا حفظنا واتعودنا .. لو سمعنا حد بيقوله

اتصل بصحابك واتصرفوا بقه

___________________________

3- قصة طريفة :-

ذكر ابن الجوزي - رحمه الله- :-

" وعضّ ثعلب أعرابياً فأتى راقياً ، فقال الراقي : ما عضك ؟ فقال : كلب ، واستحى أن يقول : ثعلب ، فلما ابتدأ بالرقية ، قال : وأخلط بها شيئاً من رقية الثعالب . "

!!!!

طيب متقول ثعلب يا سيدي وتخلص

ساعات كثير اوى .. لما حد بيبقى عنده سؤال أو طالب فتوى من شيخ أو عالم

بيستحي - بيتكسف- وهو بيسأل يقول كل التفاصيل أو يقول أنا عملت كذا وكذا

وده بيبقى سبب ان الجواب ممكن مبيبقاش صحيح لحالته

لأن هو أخفى على العالم أو الشيخ تفاصيل كثيره .. فخرج الجواب على حالة تانية غير حالته

وده خطأ السائل .. وكما يقولون : السؤال الصحيح الواضح نصف الجواب

طيب لما انت مكسوف عملت كده ليه !! كان الأولى أن تستحى من الله

لكن مادام عملت كده يبقى لازم توضح ده في سؤالك علشان تاخد الجواب الصحيح

وفعلا ممكن حد يستحى انه يفضح نفسه عند عالم يعرفك او كده

فالحل لكده انك لما تسأل العالم اللى يعرفك قوله واحد أعرفه عمل كذا كذا .. يعمل ايه

متتكلمش عن نفسك .. أو تروح تسأل عالم أو شيخ ميعرفكش .. علشان ترفع الحرج عنك

لكن لااااااازم توضح كل التفاصيل المهمه لو عايز فتوى صحيحه

تانى حاجه .. مش كل حاجه نقول حنروح لحد يرقينا .. أفضل الرقيا هي رقية الإنسان نفسه

والحذر الحذر من الدجالين والمشعوذين

ارقي نفسك بنفسك أو لو رقاك أحد لااازم الرقيا تكون فيه 3 شروط

1- أن تكون بكلام الله بالقرآن أو باسماء الله وصفاته أو الوارد عن النبي عليه الصلاة والسلام
2- أن تكون بالكلام العربي المعروف معناه ، مش بالتعاويذ غير المعروفة المعنى
3- أن تعتقد أن الرقيا لا تؤثر بنفسها مبتنفعش بنفسها لكن بتقدير الله

وطبعا ألا يكون فيها شرك .. وسورة الفاتحة من أنفع ما يقرأ من الرقى

وهناك من الأحاديث الوارده عن الرسول في الرقيا الكفاية في أن يقرأه الإنسان على نفسه ويرقى نفسه

مثل الفاتحه وحديث " بسم الله أرقيك .... " وحديث " أعوذ بعزة الله وقدرته من شر ما أجد واحاذر " وغيرهم

ونحافظ على اذكار الصباح والمساء وقراءة آية الكرسي وسور الغخلاص والمعوذتين

ونسيبنا بقه من الدجالين والكلام الفاضي ده واللى يقولك اسم الوالدة ايه واللى يقول هات كام كيلو ايه من كذا واعمل كذا كباية ويحدد عدد لحاجات ولف الورقة ديه فين والبس الحجاب ده علقه في رقبتك واللى يقعد يقول كلام وتمائم غير مفهومه والكلام الفاضي ده كله .. ده كله دجل وسحر

الرقيا الشرعية زي متفقنا ليها شروط والرقيا ملهاش أشخاص محددين .. مش شغلانه هى علشان يبقى واحد مهنته انه بيرقي الناس

ارقى نفسك بنفسك أحسن حاجه و اووووعى تروح لحد من الدجالين وإن كان ظاهرهم انه عامل فيها من اهل الصلاح

ولو عضك تعلب متقولش قرصنى برغوت

1- صح :-

في الحلقتين الماضيتين تكلمنا عن كيف تفوز ببيت في الجنة بفضل الله ورحمته

طيب اليوم نتكلم عن أسهل طريقة لتعمّر بيتك في الجنة .. ليغرس لك نخل بالجنة

قال رسول الله صلى الله عليه وسلم :

" من قال سبحان الله العظيم وبحمده غرست
له نخلة في الجنة "

مفيش أسهل من كده .. واحنا في شهر رمضان .. نريد أن نكثر من الذكر
تقول : سبحان الله وبحمده .. يغرس لك نخلة في الجنة ..
وشوف بقه نخلة في الجنة يعنى ايه .. حاجه تانيه خااااالص غير اللى بتشوفها في الدنيا

ده في الجنة شجرة يسير الراكب الجواد السريع مائة سنة لا يقطعها .. ربنا يرزقنا الجنة
يعنى فى خمس دقائق تقول سبحان الله العظيم وبحمده كم مرة ؟؟
أكثر من 200 مرة .. في 5 دقائق يغرس لك أكثر من 200 نخلة فى الجنة
سبحان الله
ساكتين لييييييييه ؟؟
يلا طول منتوا قاعدين راكبين عربية راكبين مواصلات ، منتظر حاجه
اقعد قول : سبحان الله العظيم وبحمده
______________________________________

2 - غلط :-

في أوقات كثير ممكن حد يتظلم
ونبقى قاعدين ناس كثير والناس عارفه ان فيه شخص عارف الحقيقه

والناس عمّاله تتكلم في الموضوع وكل الناس متحمسين يبصوا للى عارف الحقيقه ويقولوله :
هاه ايه رأيك بقه .. قلنا الحقيقه ؟؟ الكلام ده حصل ؟؟
وهو سرحان في السماء ... وعمّال يعدّ في النجوم
ياعم الحاج .. ايه اللى حصل ؟؟
مفيييييش أى رد فعل .. هو صم بكم عمي
يروح واحد قايله : يا أخي اتكلم بقه ايييييييه .. ساكت ليه
انت متعرفش ان الرسول عليه الصلاة والسلام قال :
" الساكت عن الحق شيطان أخرس "

....................

كثير أوى بنسمع ناس تنسب القول ده للنبي عليه الصلاة والسلام
و هذا الحديث لا أصل له
قال الشيخ محمد عمرو عبد اللطيف -رحمه الله- : لم أقف له على أصل صحيح ولا ضعيف عن النبي صلى الله عليه وآله وسلم ، ولا موقوفا على أحد من الصحابة أو التابعين ومتقدمي السلف رضوان الله عليهم

وطبعا يغني عن هذا ما جاء في التحذير من كتم الشهادة كقوله تعالى : ( وَلَا تَكْتُمُوا الشَّهَادَةَ وَمَنْ يَكْتُمْهَا فَإِنَّهُ آثِمٌ قَلْبُهُ)
وزي متفقنا خلاص .. لو سمعنا حد بيقوله
أقرب بلكونة

واشرحله فيها براحه

__________________________________________
3- قصة طريفة :-

ذكر ابن الجوزي -رحمه الله- :-

" وقع رجلان على قافلة فيها ستون رجلاً ، فأخذوا مالهم وثيابهم ، فقيل لبعضهم : كيف غلبكم رجلان وأنتم ستون ؟ فقال : أحاط بنا واحد وسلبنا - سرقنا - الأخر ، كيف نعمل ؟ "
!!!!

المشكلة ان انتشر في كثير من المسلمين إلا من رحم ربي ..
حاجه خطيرة جدا .. نفس اللى حصل لل 60 رجل دول
هي :ثقافة الهزيمة النفسية
بقى فيه كثير جدا حاسيين ان اللى احنا فيه ده مش ممكن يتغير ونرجع تانى لعزّنا ونصرنا
وكثير جدا مننا معتبرين نفسهم اقل من أعدائنا بكثير
ديه الهزيمة النفسية اللى مسيطره على كثير منا

والحقيقة أننا أمة عظيمة
أمة تنهض من كبوتنا وتتحول لعملاق فجأه
مينفعش اننا يبقى من داخلنا مقتنعين ان مفيش في ايدينا حاجه واننا مهزومين مهزومين
لا .. النصر قادم والله
وهذا وعد الله ولا يخلف الله الميعاد
ولازم نعرف اننا أقوى من أعدائنا ونقدر نغلبهم .. لكن نحتاج للإيمان والصبر .. احنا مش اقل منهم
قال الله عزّ وجلّ :
" الْآنَ خَفَّفَ اللَّهُ عَنكُمْ وَعَلِمَ أَنَّ فِيكُمْ ضَعْفًا فَإِنْ يَكُنْ مِنْكُمْ مِائَةٌ صَابِرَةٌ يَغْلِبُوا مِائَتَيْنِ وَإِنْ يَكُنْ مِنْكُمْ أَلْفٌ يَغْلِبُوا أَلْفَيْنِ بِإِذْنِ اللَّهِ وَاللَّهُ مَعَ الصَّابِرِينَ "
عايزين نركز على كلمتين ( الْآنَ خَفَّفَ اللَّهُ عَنكُمْ ) و ( صَابِرَةٌ )
يعنى حتى بعد التخفيف المسلم لا يتساوى بالكافر فضلا عن يكون اقل من الكافر .. حتى بعد التخفيف مازال المسلم باثنين أو أكثر .. لكن لابد من الصبر والإيمان
لابد أن نتواصي بالصبر والإيمان والإلتزام بأحكام هذا الدين .. حتى نستحق نصر الله

لكن مينفعش ان يبقى جوانا يأس .. لأ .. لازم نعرف ان النصر جاى جاى .. واحنا اقوى منهم بإذن الله
حبيت بس اتكلم عن النقطة ديه لأن روح الإنهزام ديه بقت عند ناس كثير منا
ومش معنى ان اتنين هجموا علينا واحنا كثيييييير .. نقول
نعمل ايه واحد ضغط علينا والتانى سرقنا
ده حتى مش منطقى ..
واللى يفهم يفهم بقه
ومتنسوش العيش والحلاوة

انا كده الحمد لله خلصت السلسله بتوفيق من الله سبحانه وتعالى

شكرا جزيلا لكل اللى شجعونى على استكمالها بالمتابعه الطيبه

جزاكم الله خيرا جميعااا

والسلام عليكم ورحمة الله

ربي يجزيك كل الخير ويكثر من امثالك وبارك الله فيك
قريت كل السلسلة المذكورة تسلمي

ايه دا خلاص خلصت Sad

واللهي جميله جدا جدا جدا بجد و ربنا يارب يجازيكي كل خير عنا يارب و عن كل مسلم قرأها و اسمحيلي طبعا ابقى انقلها في المنتديات اللي انا مشارك فيها
و اتمنى اشوف عودتك الجميله معانا من تاني و بحاجات جميله زي ماتعودنا منك دايما Smile

و يارب تكوني حليتي كويس في كل امتحاناتك وبالتوفيق ليكي و لينا كلنااااااااااا بأذن الله Smile

AHMED كتب:: ايه دا خلاص خلصت
واللهي جميله جدا جدا جدا بجد و ربنا يارب يجازيكي كل خير عنا يارب و عن كل مسلم قرأها و اسمحيلي طبعا ابقى انقلها في المنتديات اللي انا مشارك فيها
و اتمنى اشوف عودتك الجميله معانا من تاني و بحاجات جميله زي ماتعودنا منك دايما
و يارب تكوني حليتي كويس في كل امتحاناتك وبالتوفيق ليكي و لينا كلنااااااااااا بأذن الله

أخجلتم تواضعنا Smile

وطبعا يا ريت تنشر السلسلة بجد مهمة جداااا
وانا جيت اهه تانى وبجد مبسوطه جدا بعودتكم الجميلة
وبالنسبة للامتحانات فالحمد لله كانت تمام ودعواتكم ليا بقا ان شاء الله
شكرا جزيلااااااا

الف شكر يا سارة على مجهودك

استفدنا كتير

شكرااااااا

:AS':

كانت سلسله رائعه حقا
بجد انا استفدت كتير منها الحمد لله
وربنا يبارك فى كل من تابع معى

اود ان اقول ان هناك جروب على الفيس بووك
سيعرض هذه السلسله فى رمضان ان شاء الله
كل يوم حلقه طوال الشهر الكريم
لمن يحب ان يتابعها من جديد
https://www.facebook.com/#!/group.php?gid=131753593523004&ref=ts

» سلسله اخلاقنا (( متجدد ))
» مكتبه صور مضحكه (( متجدد ))
» منتدى ( الطريق الى الجنه) بعد عشرين سنه ((متجدد))
» سلسله قصص الانبياء الجزء الثاني بجوده mp3 متجدد