صح وغلط وقصه طريفه (( متجدد ))

1- صح :-

بدأنا العشر الأواخر من شهر رمضان

فات الشهر بسرعه جداااااا .. والحمد لله على كل حال .. وإنا لله وإنا إليه راجعون

طيب ماذا كان يفعل النبى عليه الصلاة والسلام ؟؟

عن عائشة رضي الله عنها، قالت: «كان رسول الله صلى الله عليه وسلم إذا دخل العشر شدّ مئزره، وأحيا ليله، وأيقظ أهله» وفي رواية: «أحيا الليل، وأيقظ أهله، وجد، وشد المئزر»

وكانت أمنا عائشة تقول: "كان رسول الله صلى الله عليه وسلم يجتهد في العشر الأواخر مالا يجتهد في غيره"

كان الرسول صلى الله عليه وسلم يخص العشر الأواخر بأعمال أكثر من بقية الشهر

احيا ليله : المراد أنه كان يقوم كله أو أنه يقوم غالبه فلا ينام فيه الا قليلا.

أوقظ أهله : كان يوقظ أهله حتى أنه عليه الصلاة والسلام كان يطرق فاطمة وعلياً ليلا .. فعليك أن تشجع أهلك إلى القيام للصلاة وتتصل بصحابك وتنزلوا تصلوا التراويح والتهجد

شدّ مئزره : أى اعتزاله لنساءه للتفرغ لطلب ليلة القدر .. فسيبك من كل حاجه ممكن تشغل في ليالي العشر الأواخر

ومن أفضل الأشياء المعينة على احياء الليل وصلاة القيام هو عدم الأكل كثيرا في الإفطار .. فكل حاجه بسيطه وأخّر الأكل حتى تنتهي من القيام

ومن استطاع الإعتكاف فليعتكف فإن ذلك أدعى لبلوغ ليلة القدر

ففي العشر الأواخر ليلة القدر التى هى خير من ألف شهر ..

فمن الآن نبدأ فى صلاة التراويح والتهجد واحياء الليل ولا ننام أو ننام قليل جدا ساعة مثلا ونقوم مرة أخرى و نتفق مع الأصدقاء على الصلاة و تشجيع الأهل والأصدقاء حتى نٌوفق جميعا لقيام ليلة القدر إيمانا بالله واحتسابا بفضل الله تعالى

______________________________________________

2 - غلط :-

في ليالي العشر الأواخر .. تلاقى في بعض الأيام زحمه وفي أيام تانية عادي خالص

تيجى بقه ليلة 27 .. تجيب معاك انبوبة اكسوجين

من كثر الزحمة خلااااص مفيش نَفَسْ

زي مبيقولوا مفيش موضع قدم .. طيب ايه الزحمة ديه ؟؟

أصل الليلة ليلة القدر وكل سنة وانت طيب وبعودة الايام رمضان مبارك ياعم الحاج

.............

المشكلة بقه ان ممكن كثير من الناس اللى جاية تكون فاتها فعلا ليلة القدر

لأن ليلة القدر مش شرط يعنى انها ليلة 27

لا ممكن تبقى أى ليلة من ليالي العشر الأواخر

ولكن تُرجى أكثر في الوتر منها أكثر

يعنى ليالي 21 ، 23 ، 25 ، 27 ، 29

وممكن تبقى في الليالي الزوجية كمان فيه اقوال بكده

فكثيييير اوى بينشنوا بس على ليلة 27

وكثيييير ميروحوش يصلوا الا الليالي الفردية 23 ، 25 ،27

حتى 29 كثيييير جدا مبيصلوهاش

مخلاص بقه ليلة القدر فاتت .. مين قالك كده ؟؟

ليلة القدر ممكن تبقى في اى ليلة من العشر الأواخر ..
فنحرص إن شاء الله اننا نقوم كل ليالي العشر الأواخر لعلنا ندرك قيام ليلة القدر بفضل الله عزّ وجلّ

كل ليلة هاه .. هما 10 ليالي بس .. نشد حيلنا شوية بقه .. وبلاش اللى بيروح 27 بس ده

___________________________________

3- قصة طريفة :-

ذكر ابن الجوزي -رحمه الله- :-

" عن عمرو بن الحسن قال : خرج أهل بيت من اليمن من منازلهم حتى صاروا إلى شعب من الجبل ، فاختفوا فيه ، وقالوا : نهرب من شهر رمضان لا يدخل علينا "

!!!!

طبعا هي مش قصة طريفة يعنى انهم بيهربوا من شهر رمضان

لكن حبيت اذكرها علشان أقول

ان فيه ناس فعلا مبتحبش شهر رمضان

علشان بتحس انها مش واخده راحتها فيه

مش عارفين يعصوا براحتهم .. حتى الشلّه بتاعتهم نقصت

فيه ناس بتصلى التراويح بقه وهديت في الشهر ده

و فيه ناس زهقت من شهر رمضان .. كفاية كده بقه لسه 10 ايام ولا 8 أيام كامله !!ا

وناس نفسها العشر الأواخر ديه تخلص بسرعه

وناس تعبت من قيام الليل ومن الصيام وبعد مكانت ماشية كويس

جت في العشر الأواخر و بدأت تهنج .. الرامات عندهم تعبت

وناس شدت حليها جدا في العشر الأواخر وبتقول دايما لما بنكون في سباق ونقرب من نهايته بنجيب أخرنا .. بنعمل كل اللى نقدر عليه علشان نوصل الأول وبعد السباق ممكن نريح بقه وناخد نفسنا

وناس قطّعت نفسها في العشر الأواخر لعلهم يدركوا ليلة القدر فيُغفر لهم ما تقدم من ذنوبهم ويسعدوا سعادة لا يشقوا بعدها ابدا بإذن الله عزّ وجلّ

وناس رغم اجتهادهم الشديد .. زعلانين ان شهر رمضان جري وقرّب يخلص

انت مين في دول ؟؟ وتحب تبقى مين في دول ؟؟

- لازم فعلا نُري ربنا منا خير

ونظهر لربنا اننا بجد عايزين نستحق قيام ليلة القدر وعايزين نفوز بالمغفرة والجنة

عايزين نبقى من النبي عليه الصلاة والسلام والأنبياء والصحابة في أعالى درجات الجنة

حتختار انك تبقى انهى واحد في الناس اللى فوق دول

أنا مرضاش لنفس ولا ليكم اننا نبقى غير اللى بيموتوا نفسهم اليومين دول علشان يفوزوا بقيام ليلة القدر وبرضا الله

وافتكر انك لو في سبق أخر السباق بتبقى اكثر حته بتحاول تجري فيها

وربنا يتقبل منا ومنكم

وجزاكم الله خيرا
__________________________________________

اتمنى نقل الموضوع للخيمه الرمضانيه

بجد شكرا اوي وجزاكي الله كل خير
الموضوع جاامد اوي اوي وجيه في وقته

بجد حلو قوى يا ساره
جزاكى الله كل خير
وتم نقل الموضوع للخيمه الرمضانيه

موضوع حلو

شكرا ليكي يا ساره و جزاكي الله عنا كل خير و في انتظار كل جديد لكي

فعلا يساره الموضوع فوقتو
مرسي جدا

جزانا الله واياكم خيرا
وان شاء الله كلنا نستفيد
ان شاء الله احتمال السلسله دى تستمر لبعد رمضان
لان هى المفروض انها ابتدت من اول رمضان لكن انا بدات بالعشره الاواخر

1- صح :-
بدأنا العشر الأواخر من رمضان

فمازال أمامنا الليالي القادمة فلا نضيعها لعلنا ندرك ليلة القدر

كل ما تشتري أكثر فرصتك في الفوز تكبر

وطبعا كل متزوّد الأعمال اللى ليها نفس الثواب .. يبقى فرصك في الفوز بهذ الثواب أكثر
قال رسول الله صلى الله عليه وسلم:

"من قام ليلة القدر إيمانا و احتسابا غفر له ما تقدم من ذنبه"

وليلة القدر كما نعلم خير من ألف شهر .. فهذا فضل عظيم لا ينبغي لمسلم أن يفوته ..فما احوجنا أن يُغفر لنا ما تقدم من ذنوبنا..

فينبغي على المسلم استثمار تلك الليالي لعلنا نرزق بقيام ليلة القدر إيمانا بالله واحتسابا

طيب قد يقول أحدنا أنهى ليلة هي ليلة القدر ؟؟

اختلف العلماء رحمهم الله في تحديد ليلة القدر وتُرجى أكثر في الوتر من العشر الأواخر

طيب ما علامات ليلة القدر ؟

قول الشيخ بن عثيمين رحمه الله في الشرح الممتع

علامات مقارنة

1- قوة الإضاءة في تلك الليلة وهذه العلامة لا يحس فيها بالمدن.
2- الطمأنينة أي طمأنينة القلب وإنشراح الصدر من المؤمن فإنّه يجد راحة وطمأنينة في هذه الليلة أكثر ما يجده في بقية الليالي.
3- الرياح تكون فيها ساكنة.
4- المنام.. أنه قد يري الله الإنسان في المنام كما حصل مع بعض الصحابة.

5- اللذة.. أن الإنسان يجد في القيام لذة أكثر من غيرها من الليالي.

علامات لاحقة

الشمس تطلع صبيحتها ليس لها شعاع .. صافية.

يعلق الشيخ الشنقيطي: " سبب ذلك - والله أعلم - أن الملائكة تصعد بعد الفجر إلى السماء بعد أن كانت على الأرض فتحجب شعاع الشمس، لأن الله أخبر أن الملائكة تتنزل في ليلة القدر ".
فهيا بنا إلى احياء ليلنا كما تحدثنا بالامس لعلنا نكون ممن قام تلك الليلة ايمانا واحتسابا

وأقرب ليلة هي ليلة 23 يعنى الإثنين بليل .. اوعى تفوت هذه الليلة
ونسال الله أن يتقبل منا ومنكم

2 - غلط :-
كثير من الشباب دلوقتى وبصراحه غير الشباب كمان متضايقين من الأحوال في البلاد مثلا

أزمات كثير أوى .. من البطالة للعيش للمرتبات للشقق للغلاء .. كفاية علشان منكتأبش
فاتنين صحاب قاعدين يفضفضوا مع بعض
خلاص الحياة بقت صعبة في البلد ديه اوى .. انا مش عارف الحكومــات فين والشعب فين

فصحابه راح رادد عليه :
بقولك ايه .. متقعدش تقول حكومــات وكده .. انتوا لو شعب كويس حيبقوا كويسين !!ا

انت مسمعتش قول الرسول عليه الصلاة والسلام :

" كما تكونوا يولى عليكم "
..........................

حديث ناس كثير اوى بتقولوا

هذا الحديث ضعيف
وانظر السلسلة الضعيفه للألباني حديث رقم 320 وضعيف الجامع الصغير حديث رقم 4275

ولو سمعنا حد بيقولوا ..

خلاص بقه احنا في العشر الأواخر والمسامح كريم

وضّحله براحه وخلاص بقه

3- قصة طريفة :-

ذكر ابن الجوزي -رحمه الله- :

" سمع بعض المغفلين أن صوم عاشوراء يعدل صوم سنة ، فصام إلى الظهر وأكل ، وقال : يكفيني ستة أشهر "

ّ!!!!

طبعا هو كده مخدش ثواب ستة أشهر ولا حاجه .. هو أبطل صيامه

مش عايزين احنا كمان بعد مشدينا حلينا وتعبنا في اول رمضان ونصه مثلا .. نيجى نبوظ كل اللى عملناه في

أخر رمضان

خلي بالك أنك فيه غيييييرك كثييييييير جدا بيموتوا نفسهم في العشر الأواخر

فانت الخسران لو منافستهمش .. وفي ذلك فليتنافس المتنافسون

وانت الوحيد الخسران لو جيت على الاخر وبوظت كل حاجه
نحاول نحافظ على كل حاجه ونزيد في الخير من كل حاجه صلاة وقيام وقراءة قرآن وصدقات وحسن خلق والبعد عن اللغو وكل أنواع الخير

وربنا يتقبل منا ومنكم

فانت الخسران لو منافستهمش .. وفي ذلك فليتنافس المتنافسون
فعلا انت كده وصلت الصوره تمام جدا وجزالك الله كل الخير
واللهم نفعنا بما علمتنا وعلمنا ما ينفعنا
وشكرا علي الموضوع

الحمد لله وحده والصلاة والسلام على من لا نبى بعده

زي متفقنا حنركز شوية في جزء صح لأهميته الشديده في العشر الأواخر وحنختصر في جزء غلط وقصة طريفة شوية

1- صح :-

حيكون شعارنا في الأيام اللى جاية كلها ان شاء الله

لا تعص بالنهار علشان تُوفّق للقيام بالليل

حديث اليوم هو دعاء ..نتعلمه من ام المؤمنين عائشه رضى الله عنها

عن عائشة -رضي الله عنها- قالت: قلت: يا رسول الله، أرأيت إن علمت أي ليلة ليلة القدر، ما أقول فيها؟ قال: قولي: " اللهم إنك عفو تحب العفو فاعف عني"

يبقى نحفظ هذا الدعاء ونردده من اليوم الى اخر يوم فى رمضان بأذن الله

بقيت ايام وتنتهى ايام العشر وينتهى رمضان ..لازم نحس بالمعنى ده.... ان فاضل ايام بل ساعات وينقضى رمضان

فهل تاب الله علينا؟؟ هل رضى الله عنا؟؟؟ هل سنثبت على الطاعه بعد رمضان ام لا؟؟ هل اعتقنا من النار ام لا؟؟

نفكر في المعنى ده ونجتهد الأيام ديه

واجتهد فى الطاعه فخير الاجابه على هذا السؤال هى الاجتهاد فى الطاعه..

________________________________

2 - غلط :-

أفتكر ان مرة سمعت أحد المشايخ بيحكي عن برنامج كان بييجي في الراديو

اسمه على الناصية

كانت تيجي المذيعه وتعمل حوار مع أحد الناس وتسأله شوية اسأله

فمرة بتسأل واحد : ايه المبدأ اللى انت حاطه لنفسك وماشي عليه ؟؟

عمل فيها شيخ بقه ورايح قايل :

قول الله عزّ وجلّ في الحديث القدسي :

" اعمل لدنياك كأنك تعيش أبدا واعمل لآخرتك كأنك تموت غدا "

المذيعه : صدق الله العظيم

...........................

الحديث ده أصلا بيتقال على أنه حديث للرسول عليه الصلاة والسلام .. بس ده بقه اخترع حاجه جديده .. خلاه حديث قدسي .. والمذيعه طبعا في المحيط الهادي

هذا الحديث لا أصل له

اختراع يعنى
وانظر السلسلة الضعيفة حديث رقم 8

وطبعا لو سمعت حد بيقوله ..

ودّيه للمذيعه

_________________________________

3- قصة طريفة :-

ذكر ابن الجوزي -رحمه الله- :

" دعى بعض المغفلين إلى دعوة ، فاشتغل الناس بالأكل وجعل هو ينظر إلى الستور المعلقة - الستاير يعنى - ، وكانت الحيطان كلها قد سُترت ، فقيل له : مالك لا تأكل ؟! فقال : والله لقد طال تعجبي من هذه الستور الطوال كيف دخلت من هذا الباب القصير ؟؟ "

!!!

مش عارف هو مستغرب ليه .. ما أكيد حته الستاير وبعدين بنوا البيت !!ا

مش عايزين في الأيام اللى فاضله من رمضان ديه نشغل نفسنا بحاجات هايفه مش مفيده

عايزين نركز في المفيد لينا زي ما اتفقنا زي الصلاة والذكر وقراءة القرآن والقيام والدعاء والصدقة وافطار الصائمين

سيبك من الحاجات اللى ممكن تشغل وقتك وممكن تأجلها لبعد رمضان

اللى بيلعب لعبة على الكمبيوتر وقرّب يقفلها .. مش لازم دلوقتى يا سيدي .. اشغل نفسك بالمفيد

اللى كل يوم بليل يخرج يقعد مع صحابه أو عايز ينزل يشترى حاجات ممكن تتأجل .. يأجّل كل ده

أى حااااااجه تقدر تأجلها أجلها .. الفطار بره مع صحابك في مائده الرحمن .. سيبك منه يا سيدي

لعب كوره مثلا .. عزومات .. زيارات عائلية .. أجلّها ياسيدي العيد جاى وحنزور كل أقاربنا

أى حاجه حتى لو مباحة وغير عاجلة وممكن تأجلها الأفضل تأجلها بعد رمضان

متشغلش نفسك غير بالمفييييييد

فما بالك بالحاجات الهايفة اللى مينفعش تفكر فيها أصلا حتى في الأيام العادية زي صاحبنا بتاع الستاير

صحيح .. حد عرف الستاير دخلت ازاى ؟؟ حيجننى الموضوع ده

جميل جدا جدا والله يا ساره
بجد شكرا ليكي كتير و جزاكي الله عنا كل خير يارب العالمين

1- صح :-

اتفقنا اننا في الفترة ديه نحافظ على الأذكار ونحافظ على السنن الرواتب وعلى صلاة الضحى والوتر والقيام والفجر وسنة الفجر

بس فيه حاجه مهمه جدااااا متكلمناش عنها .. هي

الصدقة

عن ابن عباس رضى الله عنه قال:

كان رسول الله صلى الله عليه وسلم أجود الناس وكان أجود ما يكون في رمضان حين يلقاه جبريل

الحديث معناه أن الرسول صلى الله عليه وسلم كان أكثر الناس جودا بالخير .. وكان أجود ما يكون في رمضان يكثر فيه من الصدقات أكثر من غيره من الشهور

فالصدقة في شهر رمضان أفضل من غيرها .. تصدق بأى شئ ولا تحقرن من المعروف شيئا .. تصدق بأى شئ ولو بربع جنيه

ومتخافش أن يقل مالك من التصدق .. فقد أقسم الرسول صلى الله عليه وسلم انه لا ينقص مال من صدقة

وقال رسول الله صلى الله عليه وسلم

كل امرىء في ظل صدقته حتى يُقضى بين الناس

فالصدقة سبب في أن تكون فى الظل حتى يُقضى بين الناس ويُحكم بينهم

و تحب تكون من السبعة الذين يظلهم الله في ظل عرشه يوم لا ظل إلا ظله ؟؟

إذن عليك بالصدقة .. صدقة خالصة لوجه الله تخفيها عن الناس

ففي حديث السبعة الذين يظلهم الله في ظل عرشه يوم لا ظل إلا ظله قال رسول الله عليه الصلاة والسلام :

رجل تصدق بصدقة فأخفاها حتى لا تعلم شماله ما تنفق يمينه

ولا تعلم شماله ما أنفقت يمينه كناية عن المبالغة فى الإخفاء - مش فرحان اوى ان الناس شايفاك ونفسك تنادي صحابك كلهم يشوفوك وانت بتطلّع الربع جنيه

فنتفق بقه الكام يوم اللى فاضلين ميعدّيش يوم الا وتكون تصدقت بحاجه

بلاش بقه البخل ده

_________________________________

2 - غلط :-

في الايام ديه .. بقه خلاص اللغة الاجنبية في كل حته
تمشي في الشوارع المحلات كلها تقريبا اسماءها مكتوبة بالانجليزي

تيجى تتكلم مع حد تلاقى نص كلامه عمّال يدخل كلمات اجنبيه

تقوله ازيك ؟

يقولك : great

رايح انهارده التراويح ؟

Yes

حتروح لوحدك ولا مع حد ؟؟

I think حروح لوحدى

طيب يا سيدي ربنا يتقبل

I hope ربنا يتقبل

ايه ياعم هو انت لسه واقع من سيديهاية تعليم انجليزي ؟؟ ايه الحكاية ؟؟

what's the problem ??

انت مسمعتش حديث الرسول عليه الصلاة والسلام :

" من تعلّم لغة قوم آمن مكرهم "

..........................

مش سمعتوا الحديث ده كثييييير قبل كده ؟؟

هذا الحديث : باطل لا اصل له
قال الشيخ الوادعي : هذا الحديث بحث عنه الباحثون فلم يجدوا له أصلاً وقال الشيخ العلوان : لا أعلم هذا حديثاً ولا أظن له أصلاً

وزي متفقنا .. لو سمعنا حد بيقوله ؟؟

نقوله

NO .. This is Wrong

______________________________________

3- قصة طريفة :-

ذكر ابن الجوزي -رحمه الله- :

حكى أسحاق بن إبراهيم قال : حضرت جنازة لبعض القبط - النصارى- ، فقال رجل منهم : من المتوفِّي؟ فقلت : الله ، فضُربتُ حتى كدت أموت "

هو الراجل مغلطش بس المشكلة انه قال الكلام في مكان غير مناسب أو قاله بطريقة غير مناسبة

موضّحش قصده

يعنى هما بيسألوه من المتوفِّي -بكسر الفاء المشدده- اسم فاعل فهو رد : الله ، لأن الله هو الذي يتوفى الأنفس .. اما الميت يُقال عنه متوفًّى - بفتح الفاء المشدده- اسم مفعول

فمفهموهوش فمسكوه ضربوه لحد مكان حيموت

فنخلي بالنا من كلامنا

بجد يا ساره والله رائع رائع رااااااااااااااااااااااائع
انا بستنى موضوعك والله على طول و متابعه لأن بجد فكرته غايه في الجمال
شكرا ليكي كتير و في انتظار المزيد

AHMED كتب:: بجد يا ساره والله رائع رائع رااااااااااااااااااااااائع
انا بستنى موضوعك والله على طول و متابعه لأن بجد فكرته غايه في الجمال
شكرا ليكي كتير و في انتظار المزيد

متشكره جدا جداا بجد
ويا ريت فعلا الكل يتابع الموضوع لانه مهم جدا
نورتنى والله

الله عليكي بجد
انا اول مره اشوف الموضوع دا و بجد جميل جدا جدا والله
ياريت مش يبقى في رمضان بس و ياريت يستمر حتى بعد رمضان
شكرا ليكي اوي و ربنا يجازيكي الجنه عنا يارب

نسرين كتب:: الله عليكي بجد
انا اول مره اشوف الموضوع دا و بجد جميل جدا جدا والله
ياريت مش يبقى في رمضان بس و ياريت يستمر حتى بعد رمضان
شكرا ليكي اوي و ربنا يجازيكي الجنه عنا يارب

ان شاء الله يستمر بعد رمضان
شكرا لمتابعتك وجزاكى الله خيرا

1- صح :-

الليلة إن شاء الله ليلة 29

و ديه ليلة بيغفل عنها كثييييييير مننا .. لأن بتلاقى كثيير قوى
خلاص بعد ليلة 27 بدأ يكسّل يروح التراويح والتهجد

رغم انها احتمال تكون ليلة 29 هى ليلة القدر

يبقى سريييعا نفتكر دعاء ليلة القدر ونجتهد في العبادة في الليلة ديه لعلها تكون ليلة القدر

الدعاء : اللهم انك عفو تحب العفو فاعف عني

............................................

ايه رايكم نصوم بقه السنة كلها ؟؟

نصوم السنة كلها !! انت شكلك كده الصيام أثّر عليك .. السنة كلها ايه !!!ا

ده احنا بنصوم رمضان واييه بنبقى خلاص .. قاعدين طول النهار نحلم بالفراخ والكباب والكفته والمندي و البسبوسة والقطايف والكنافة والفاكهة والعصائر وقمر الدين والبط والوز و و و و

-على أساس اننا بنسأل ابن أبو شقره-

لا متخافوش مش القصد اننا نصوم كل ايام السنة .. لكن بما اننا صمنا رمضان الحمد لله

فيه حاجه كمان بقه لو عملناها .. وهي بسيطة جدا إن شاء الله مش متعبه

يبقى ثوابنا كاننا صمنا الدهر .. السنة كلها

بتتكلم بجد !! كأننا صمنا السنة كلها !! ايه هي ؟؟

قال رسول الله صلى الله عليه وسلم :

" من صام رمضان و أتبعه ستا من شوال كان كصوم الدهر "

يعنى اللى صام رمضان وصام بعده 6 أيام من شهر شوال .. كأنه صام السنة كلها

ازاى بقه .. 30 يوم رمضان و 6 من شوال =36 يوم *10 = 360

سبحان الله .. يعنى بعد مصمنا 30 يوم .. بيتهيئلى مش
حتبقى حاجه متعبة ان نصوم 6 ايام كمان

بس اكيد مش حنصوم يوم العيد

علشان ناخذ ثواب صيام السنة كلها بفضل الله عزّ وجلّ .. ونسأل الله القبول

واللى عليه قضاء أيام فطرها لأى عذر .. ياريت يحاول يقضي الأيام اللى عليه الأول وبعدين يصوم الستة ايام

يلا نصوم بقه واحنا سخنين كده بعد رمضان فمش حنتعب وبلااااش كسل

ده الأجر صيام السنة كلها

__________________________________

2 - غلط :-

ساعة الإفطار كل يوم

نلاقى ابن ابو شقرة اللى فوق ده بقه يهجم على الأكل .. ميرحمش

يبدأ بالتمر وطبعا بياكل عدد وتر فبياكل 99 بلحه

ويخش عالشربة وبعدين ال 13 طبق رز واللحمة .. يخلص اللحمة : هاتولي الفراخ

يخلص الفراخ : هاتولى الكباب ، يخلص الكباب : هاتولى البط

وبعدين خلاص الحمد لله .. هاتولى بقه الحلو علشان نحلّي
صنية البسبوسة وبعدها القطايف وهجم على الكنافة و5 لتر عصير

لحد مبقى مش قادر يتكلم عمال يحشرج زي البطة

صاحبه راح قايله : ايه ياعم انت ده .. ايييييييييييه حراااام عليك

انت مسمعتش حديث الرسول عليه الصلاة والسلام :

" نحن قوم لا نأكل حتى نجوع وإذا أكلنا لا نشبع "

........

حد سمع الحديث ده قبل كده ؟؟

الحديث ده : لا أصل له

اختراع يعنى
قال الشيخ الألباني في السلسة الصحيحة (المجلد السابع القسم الثالث) لا أصل له).

وبرضه لأن ده حديث منتشر قوى .. لو سمعنا حد بيقوله

نقوله فيه أحاديث تانية صحيحه زي :

ما ملأ آدمي وعاء شرا من بطنه بحسب ابن آدم أكلات يقمن صلبه فإن كان لا محالة فثلث لطعامه و ثلث لشرابه و ثلث لنفسه

ومن غير ضرب

برااااحه

_____________________________________

3- قصة طريفة :-

ذكر ابن الجوزي -رحمه الله- :-

" كان بعض المغفلين يقول : اللهم اغفر لي من ذنوبي ما تعلم وما لا تعلم "

!!!!!!

هو طبعا كلامه مش طريف تماما

لكن مغفل بقه .. حنقول ايه !!ا

هو شكله كان بيسمع ناس بتقول : اللهم اغفر لنا من ذنوبنا ما علمنا منه وما لم نعلم

فهو مش واخد باله .. لكن طبعا لو قال اللى قاله وهو قاصد ومعتقد كده فده كفر

المهم ان احنا برضه عندنا أخطاء في الدعاء .. أخطاء !! ازاى بقه ؟؟

من الأخطاء ديه إنك تلاقى واحد تقوله ادعيلي مثلا يقولك : ربنا يكرمك إن شاء الله

تقوله تعبان شوية يقولك ربنا يشفيك إن شاء الله

جالك أى حاجه كويسه يقولك ربنا يباركلك إن شاء الله

طبعا لاحظتم قصدي على ايه .. على قول " إن شاء الله " في الدعاء

من الخطأ انك وانت بتدعي تستثني -يعنى تقول إن شاء الله- .. الصح إنك تعزم المسألة.. تقول ربنا يكرمك ، أو ربنا يشفيك ، ربنا يباركلك

قال رسول الله عليه الصلاة والسلام :
" إذا دعا أحدكم فلا يقل: اللهم اغفر لي إن شئت و ليعزم المسألة و ليعظم الرغبة فإن الله لا يعظم عليه شيء أعطاه "

حاجه تانية من الأخطاء منتشرة جدااا بقه .. في الإستغفار
تلاقى الواحد قدامك اتنرفز شوية كده ولا عمل حاجه غلط وحتى ساعات ناس بعد الصلاة بدل متقول استغفر الله 3 مرات تروح قايله :

استغفر الله العظيم من كل ذنب عظيم

يعنى ايه بقه من كل ذنب عظيم ؟؟ يعنى الذنوب اللى مش عظيمه منستغفرش منها !!ا

نسيبها نتعذب بيها يعنى ولا ايه ؟!؟

لا نستغفر الله العظيم من كل ذنب .. سواء كان صغير أو كبير .. فبلاش من كل ذنب عظيم ديه

اللى ألفها كده طلعها علشان تبقى ماشية سجع يعنى .. بس المعنى غلط

حاجه ثالثه بقه ومنتشرة قوى حتى بين أئمة مساجد ساعة الدعاء

في وسط الدعاء يقعد يقول برحمتك يا أرحم الراحمين

طبعا مش ده الغلط .. بس الغلط انه يقولها بعد دعاء زي :

اللهم أهلك الظالمين مثلا .. أو اللهم أرسل عليهم البراكين .. أو اللهم شرد الكافرين

أو أى دعاء من الأدعية ديه .. فازاى يستقيم المعنى

نوضح .. خلاص حوضح محدش يقعد يهرش في دماغه ويقول الراجل ده بيقول ايه

يعنى لما نقول : اللهم عليك باليهود وأرنا فيهم عجائب قدرتك برحمتك يا أرحم الراحمين

الكلام مش مستقيم .. الصح مثلا يتقال بقوتك وعزتك .. مثلا ..
مقتضى الكلام لا يستقيم معه برحمتك يا أرحم الراحمين

لكن برحمتك يا أرحم الراحمين تيجى بعد اللهم ارزقنا الجنة أو نجنا من النار أو اغفر لما أو اعتق رقبتنا .. كده يعنى

يارب تكون المسألة وضحت .. ونفتكر قول الإعرابي اللى سمع
آية والسارق والسارقة

لما قرأ أحدهم قول الله عزّ وجلّ :

" وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِنْ اللَّهِ وَاللَّهُ عَزِيزٌ حَكِيمٌ "

ولكن قال : والله غفور رحيم بدلا من والله عزيز حكيم

قال الأعرابي: أعد الآية فأعادها برضه زي مقالها أول مرة : (واله غفور رحيم ) فقال له: أعد الآية, فأعادها ولكن قال : ( وَاللَّهُ عَزِيزٌ حَكِيمٌ فقال الأعرابي : الآن أصبت .. وبعدين بيّن بقه هو ليه قعد يقوله عيد فقال: لأنه لو غفر ورحم ما قطع, ولا تتناسب المغفرة والرحمة مع القطع, لكنه عزّ وحكم فقطع.

فعايزين نتأمل كده زي الأعرابي ده برضه

حاجه رابعه .. التعدي في دعاء .. ومنه اللى بيدعي على نفسه مثلا علشان طاعه

يعنى يقول مثلا : اللهمك أهلكنا في طاعتك ، اللهم أهلك صحتنا في طاعتك ، اللهم أذب شحومنا في طاعتك

ده تعدي في الدعاء فالله قادر أن يجعلك تعبده وتطيعه بدون أن تهلك صحتك .. ومن أدراك انك لو هلكت صحتك تقدر تعبد الله ؟!!؟

لأ .. نسأل الله أن يعيننا على ذكره وشكره وحسن عبادته وأن يعافينا ويرزقنا العافيه

ديه أمثله سريعه .. فيه برضه اللى يقعد يدعي : يارب بحق جاه النبي .. قلنا لا تجعل بينك وبين الله واسطه ولو كان النبي عليه الصلاة والسلام وده بينّاه في حلقة سابقه .. ادعي على طول

معلش بقه رمضان قرب يخلص قلت أرغي بقه براحتى

واستنوا الحلقة الجاية إن شاء الله .. حلقة خاصة جدا

بمناسبة العيد

وكل سنة وأنتم طيبين

هههههههههههه

الجزء الخاص بالغلط دا بحبه جدا بجددددددد شكرا ليكي اوي اوي يا ساره و في انتظار المزيد

AHMED كتب:: هههههههههههه

الجزء الخاص بالغلط دا بحبه جدا بجددددددد شكرا ليكي اوي اوي يا ساره و في انتظار المزيد

فعلا انا كمان بستمتع بالجزء الغلط
والاجزاء الجايه ان شاء الله هيطلع فى كلام كتييييييييير غلط بنقوله للاسف
اتمنى الموضوع يفيد الجميع
منورنى دايما يا رب

غلط :-

غلط انهارده فهم خاطئ لآية وحديث

وهي أن ليلة القدر خير من الف شهر

كثيييييييير جدااااا نلاقى اللى بيتكلم عن ليلة القدر يقول :

وهذه الليلة تساوى عبادة 84 سنة تقريبا

مش سمعتوا ده كثير جدا ؟؟

الغلط انها لا تساوي عبادة 84 سنة .. يعنى لا تساوي عبادة ألف شهر

لكن هي أفضل من 84 سنة .. أفضل من الف شهر

لأن الله عزّ وجلّ قال : " لَيْلَةُ الْقَدْرِ خَيْرٌ مِنْ أَلْفِ شَهْرٍ "

وخير هنا أصلها أخير - اسم تفضيل- وحذفت الهمزة للتخفيف

يعنى ليلة القدر أفضل من ألف شهر

أفضل بقد ايه ؟؟ الله أعلم

ولكن ده يدل على فضلها العظيم .. فاحرص على ألا تحرم قيامها

_______________________________

قصة طريفة :-

ذكر ابن الجوزي -رحمه الله- :

" قال بعض الناس لمملوكه : اخرج وانظر هل السماء مصحية أو مغيمة -السماء صافية ولا مغيمه -، فخرج ثم عاد فقال : والله ما تركني المطر انظر هل هى مغيمه أم لا "

!!!!

بسبب ان الناس نِفسها تعرف خلال العشر الاواخر الليلة ليلة القدر ولا لأ

كل ليلة يقعدوا يبصوا في السماء ..

وكل واحد بقه يبتدى يتخيل

بيتهيئلي السماء انهارده صافية شكلها هي ليلة القدر

التاني : لا فيه سحابه هنااااااك اهيه .. تبقى مش ليلة القدر .. انا جد جد جدي قالى ان مش ممكن ابدااا اشوف فيها سحابه

واللى يتخيل انها مش ليلة القدر تلاقيه كسّل عن القيام وكأن خلاص بقه متأكد ان ديه مش ليلة القدر

ويمكن يكلم صحابوا اللى كانوا رايحين يصلوا تراويح وتهجد يقولهم يا جماعه مش لازم انهارده

مش ليلة القدر تعالوا نروح بقه نقضي الليلة فى اى مكان ونبقى نصلي بكره

تحس انه خد توكيل ابليس

يا جماااااعه علامة ليلة القدر زي مقلنا اللى ممكن تعرفها من النظر للسماء هي

قوة الإضاءة في تلك الليلة وهذه العلامة لا يحس فيها بالمدن.

ميتحسش بيها في المدن

يعنى محدش يقعد بقه كل ليلة يعمل فيها خبير ارصاد قوية
سيبكم من النظر للسماء ده كل ليلة وكل واحد يبتدي يقول النشرة الجوية

محدش حيحس بالعلامة ديه في المدن .. ريحيوا نفسكم

ونركز اننا نجتهد في كل الليالي ونقومها

بغض النظر بقه شايفين السماء صافيه ولا مغميه ..

ومتسمعش كلام حد يقولها بصيت في السماء وشكلها مش هي

خصوصا لو كان زي أخينا اللى فوق بتاع المطر

هركز الفتره الجايه ان شاء الله على الجزء الخطأ
اتمنى تتابعونى

1- صح :-

خلاص .. رمضان خلص

الحمد لله على كل حال .. نسأل الله أن يتقبل منا رمضان

الثلاثين يوم عدوا في اسبوع

طيب حنعمل ايه بعد رمضان ؟؟

سؤال مهم اوى .. حنرجع تانى نسيب الصلاة في المسجد ؟؟
حنرجع تانى نسيب السنن ؟؟

حنرجع نسيب قيام الليل ؟؟ حنرجع ننسى الصيام ونفتكره على أخر شعبان اللى جاى ؟؟

حننسى صلاة الضحى والوتر والفجر ؟؟ حننام عن صلاة الصبح تانى ؟؟

اللى لبست حجاب وظبطت لبسها .. حترجع تانى زي الأول؟؟
اللى ساب السجاير حيرجع تانى ؟؟

اللى بعد عن المعاصي حيرجعلها تانى ؟؟

لاااازم نقف وقفة سريييعه .. رمضان خلص .. احنا ليه عملنا الكلام ده كله في رمضان

علشان مين ؟؟ .. علشان ربنا

طيب رمضان خلص .. ولكن رب رمضان يراك ويحاسبك في كل وقت .. مش في رمضان بس

عايزين نثبت على الطاعه بعد رمضان

كل حاجه عملناها في رمضان منسيبهاش .. حتى لو كانت اقل وده طبيعي

يعنى قيام الليل منسيبوش .. حتى لو ركعتين مع نفسك وانت ماسك المصحف

صلاة السنن منسيبهاش .. الفجر مننامش عنه .. الصيام مننساهوش

طيب عايزين نثبت بعد رمضان نعمل ايه ؟؟

بداية حنقول حاجه من وصايا النبي عليه الصلاة والسلام
لو عملناها إن شاء الله تكون من وسائل الثبات

عن أبي هريرة رضي الله عنه قال

أوصاني خليلي صلى الله عليه وسلم بثلاث [ لا أدعهن حتى أموت ]
صيام ثلاثة أيام من كل شهر وركعتي الضحى وأن أوتر قبل أن أنام

أظن حاجات بسيطة .. بس علشان مننقطعش عن الطاعات بعد رمضان

ثلاث أيام من كل شهر .. الثلاث البيض وركعتين الضحى وتصلى الوتر قبل متنام

بس كده .. ونبعد عن اصدقاء السوء .. مش عايزين نرجع للشلة الفاسده

خصووووصا يوم الوقفه ده

الشياطين بتتفك ولسه راجعه .. متخليهاش اول مترجع تضيعك تانى

ومتنسوش الصدقة فهي من وسائل التثبيت .. والدعاء
وتقبل الله منا ومنكم

ثلاثة أيام من كل شهر و ركعتين الضحى والوتر

وكل سنة وانتم طيبين

________________________________

2 - غلط :-

كثير اوى نسمع الوعّاظ والخطباء يكرروا حديث قدسي

علشان يرققوا بيه القلوب والناس تتوب

وممكن نسمعه بعد رمضان علشان يحثّوا الناس على الثبات

حديث مشهوووووووووووور قوى

يقول قال رسول الله صلى الله عليه وسلم : قال الله عزّ وجلّ :

" إنى والإنس والجن فى نبأ عظيم ، أخلق ويعبد غيرى ، أرزق ويشكر سواى ، خيرى إلى العباد نازل وشرهم إلىّ صاعد ، أتودد إليهم بالنعم وأنا الغنى عنهم ! ويتبغضون إلىّ بالمعاصى وهم أفقر ما يكونون إلى ، أهل ذكرى أهل مجالستى ، من أراد أن يجالسنى فليذكرنى ، أهل طاعتى أهل محبتى ، أهل معصيتى لا أقنطهم من رحمتى ، إن تابوا إلى فأنا حبيتهم ، وإن أبوا فأنا طبيبهم ، أبتليهم بالمصائب لأطهرهم من المعايب ، من أتانى منهم تائباً تلقيته من بعيد، ومن أعرض عنى ناديته من قريب ، أقول له : أين تذهب؟ ألك رب سواى ، الحسنة عندى بعشرة أمثالها وأزيد ، والسيئة عندى بمثلها وأعفو ، وعزتى وجلالى لو استغفرونى منها لغفرتها لهم "

................................

الحديث أكييييييييييييييد مشهووووووووووور جداااااااااااا

بس الحديث ده : ضعيف

_______________________________________

3- قصة طريفة :-

ذكر ابن الجوزي -رحمه الله- :-

" وقف شيخ بباب مسجد والمؤذن يقيم الصلاة، فدخل فرأى المؤذن هيبته وشيبته، فسأله ان يصلي بهم، فامتنع، فتقدم المؤذن وصلى بهم، فلما فرغ أقبل على الشيخ فقال له: ما منعك أن تصلي بنا فتكسب أجراً ؟ فقال : أنا وحقك إذا كنت على غير طهارة لم أصل إماماً."

يعنى لو كان مش متوضى ميصليش إمام !!ا

ايه الفرق بقه بين الصلاة إمام ومأموم !!ا

مفيش لازم في الحالتين تبقى على طهاره

نفس الكلام ايه الفرق بين رمضان وغير رمضان ؟؟

في الاتنين لازم نبقى في طاعه

حتى او حتقل عن رمضان شوية .. بس لازم نفضل على طاعه

رب رمضان هو رب العام كله

مينفعش نغلط زي الراجل ده كده ونفرّق بين رمضان وغير رمضان

حاجه تانية بسرعه .. مش اى حد في اى فضائية يتصدر للكلام ويعمل برنامج نسمعله ونثق فيه

خصوصا لو كان بيتكلم بحاجات غلط واحاديث غلط

زي الشيخ اللى كان في القصة ده .. كلهم افتكروه امام كبير .. طلع بيصلي من غير وضوء

خصوصا اننا بعد رمضان ممكن نلاقى كثير مننا تابوا واقبلوا على سماع الدروس ومتابعة البرامج

مش اى حد نسمعله .. نسمع ونتفرج على الشيوخ الثقات ..أو اللى العلماء وثقوهم

وخلينا مع القنوات اللى زي

زي الحكمة والرحمة والناس مثلا

وتااانى يا جماعه .. رب رمضان هو رب كل العام

مش رمضان نبقى حاجه وعلى طهارة وغير رمضان نبقى غير كده

بلاش نبقى زي الجدع اللى فوق ده

ثانكس اوي اوي ساره و انا والله لسه كنت رايح اكتبلك في الموضوع ماتنسييش تكملي يا ساره
شكرا ليكي مره تانيه

رااائع يا ساره و الإضافه الأخيره دي مهمه جداااا خصوصآ الحديث القدسي...أنا تقريبآ سمعت كل شيوخ مصر بيقولوه شكرااااا ساره

العفو وبجد مبسوطه بالمتابعه دى
وان شاء الله هركز على الجزء الخطأ

الله ما شاء الله بجد والله موضوع مفيش جمال بعد كداالله بجد ياسارهاستمري وان شاء الله متابعه على طووولشكرا ليكي اوي ياساره

donia كتب:: الله ما شاء الله بجد والله موضوع مفيش جمال بعد كدا الله بجد ياسارهاستمري وان شاء الله متابعه على طووول شكرا ليكي اوي ياساره

الموضوع رائع بمتابعتك يا دنيا
ميرسى جدا يا قمر

ان شاء الله هكمل الموضوع بنفس الاسلوب
وان شاء الله نستفاد منه ونطبقه رمضان القادم باذن الله

1- صح :-

في جزء " صح " بمناسبة بداية شهر رمضان .. دايما أحب أذكر بحديث مهم جدا مع بداية الشهر المبارك

ألا وهو حديث :

من صام رمضان إيمانا و احتسابا غفر له ما تقدم من ذنبه

إذن حتى تتحقق المغفرة ويُغفر لنا ما تقدم من ذنوبنا لابد من شرطان ..

أن يصوم الإنسان إيمانا و إحتسابا ... الأمر يحتاج لنية

إيمانا : بالله و بما أنزل و بما فرضه علينا ... فنصوم لأنه فرض علينا يجب صيامه ... و لأنه من أركان الإسلام ... مش لأننا بنصوم علشان متعودين نصوم .. علشان كله بيصوم .. علشان عيلتنا كلها بتصوم .. لا

الموضوع لازم يكون عبادة مش عادة بنصوم علشان ربنا فرض علينا صيام الشهر ده .. فبنتعبد لله بالصيام

و إحتسابا : نحتسب الأجر و المغفره ...و إنى بصيامى هذا أحتسب أن يغفر الله لى ما تقدم من ذنبي ..وأنى سأثاب بهذا الصوم

وممكن حد يسبق الثاني بكثيير بسبب النية الصحيحة .. فنحسن النية حتى يغفر لنا ما تقدم من ذنوبنا برحمة الله

هذا كان توضيح بسيط جدا للحديث ... و نرجو تحقيق هذين الشرطين ... حتى يغفر الله لنا ما تقدم من ذنوبنا ...

2- غلط :-

طبعا ومع بداية شهر رمضان .. تلاقوا كثييييير جداااا من الأئمة في الخطب وتلاقي في الراديو والتلفزيون حديث مشهوووور جدا مع بداية رمضان

أظن أن كلكم سمعتوه كثير .. عن نفسي اليوم فقط سمعته مرتين .. مره في إذاعة القرآن الكريم

ومره في مسجد

الحديث هو خطبة الرسول عليه الصلاة والسلام المشهورة المزعومة :

عن سلمان رضي الله عنه قال خطبنا رسول الله صلى الله عليه وسلم في آخر يوم من شعبان قال يا أيها الناس قد أظلكم شهر عظيم مبارك شهر فيه ليلة خير من ألف شهر شهر جعل الله صيامه فريضة وقيام ليله تطوعا من تقرب فيه بخصلة من الخير كان كمن أدى فريضة فيما سواه ومن أدى فريضة فيه كان كمن أدى سبعين فريضة فيما سواه وهو شهر الصبر والصبر ثوابه الجنة وشهر المواساة وشهر يزاد في رزق المؤمن فيه من فطر فيه صائما كان مغفرة لذنوبه وعتق رقبته من النار وكان له مثل أجره من غير أن ينقص من أجره شيء قالوا يا رسول الله ليس كلنا يحد ما يفطر الصائم قال يعطي الله هذا الثواب من فطر صائما على مذقة لبن أو تمرة أو شربة من ماء ومن أشبع صائما سقاه الله من الحوض شربة لايظمأ حتى يدخل الجنة وهو شهر أوله رحمة ووسطه مغفرة وآخره عتق من النار فاستكثروا فيه من أربع خصال خصلتان ترضون بهما ربكم وخصلتان لاغنى بكم عنهما أما الخصلتان اللتان ترضون بهما ربكم فشهادة أن لاإله إلا الله وتستغفرونه وأما الخصلتان اللتان لاغنى بكم عنهما فتسألون الجنة وتعوذون من النار

مش سمعتوه كثير ؟؟

هذا الحديث رغم شهرته الكبيرة .. حديث منكر .. لا يصح ولا يثبت عن الرسول صلى الله عليه وسلم

الحديث ده لم يقله الرسول صلى الله عليه وسلم .. فيجب الحذر من هذا الحديث ومن ترديده لأنه ضعيف سندا ومتنه منكر

متنه يعنى محتوى الكلام به .. منكر يعنى يخالف أحاديث أخرى صحيحة .. وإن قاله أمامك أحد حاول أن تنصحه بينك وبينه مش قدام الناس وتبينله أنه حديث غير صحيح.
و ده تخريج الحديث
الراوي: سلمان الفارسيالمحدث: الألباني - المصدر: السلسلة الضعيفة - الصفحة أو الرقم: 871
خلاصة الدرجة: منكر

3- قصة طريفة :-

بمناسبة القيام في شهر رمضان ..

قال ابن الجوزي -رحمه الله -في كتابه أخبار الحمقى والمغفلين :

وكان أعرابي يصلي ، فأخذ قوم يمدحونه ويصفونه بالصلاح -وهو يصلي ويسمعهم - ، فقطع صلاته وقال : مع هذا إنى صائم ..
!!

نسأل الله الإخلاص ونعوذ بالله من الرياء ..

الرجل من كثر ما عجبه كلام الناس خرج من الصلاة علشان يقولهم انه صايم كمان .. مش بس بيصلي كويس ..ده كمان صايم علشان يبدأوا فقرة جديده في مدحه

فالشاهد إننا يجب أن لا نعجب بكلام الناس عنا ولا نفرح بمديح الناس لنا فيسبب هذا الرياء فينا ويذهب الإخلاص
وتذكر فعل سيدنا أبو بكر الصديق -رضى الله عنه- عندما كان يمتدحه أحد فكان يبكي ويقول :

اللهـــــــم أنت أعلم بي من نفســي
وأنـــــــا أعلــم بنفســــي منهــــــم
فاجعلنـــــي خيراً ممــا يحســـبون
وأغفر لي برحمتك ما لا يعلمون
ولا تؤاخذنــــي بمـــا يقولـــــــون

فنبدأ بالاخلاص إن شاء الله ونبعد عن الرياء حتى يُتقبل منا بفضل الله

» سلسله اخلاقنا (( متجدد ))
» مكتبه صور مضحكه (( متجدد ))
» منتدى ( الطريق الى الجنه) بعد عشرين سنه ((متجدد))
» سلسله قصص الانبياء الجزء الثاني بجوده mp3 متجدد